Shkencëtarët besojnë se kanë regjistruar për herë të parë aktivitet elektrik në atmosferën e Marsit, duke sugjeruar se planeti mund të prodhojë rrufe.
Roveri Perseverance i NASA-s, i cili zbriti në Mars në vitin 2021, u dërgua për të kërkuar shenja jete dhe ka kaluar katër vitet e fundit duke eksploruar rajonin e Kraterit Jezero.
Shkarkime elektrike, të quajtura “rrufe të vogla”, u identifikuan përmes regjistrimeve audio dhe elektromagnetike të pajisjes SuperCam të roverit. Shkencëtarët shpresojnë që pajisje të reja, më të ndjeshme për matjen e shkarkimeve atmosferike dhe kamera më të avancuara, të mund të dërgohen në Mars për të konfirmuar plotësisht këto zbulime. Një ekip kërkuesish nga Franca analizoi 28 orë regjistrime audio të bëra gjatë dy viteve marsiane (1,374 ditë tokësore).
Ata zbuluan se shkarkimet elektrike shoqëroheshin zakonisht me vorbullat e pluhurit (dust devils) dhe me frontet e stuhive me pluhur.
Dust devils janë vorbulla të vogla që formohen nga ajri i nxehtë që ngrihet nga sipërfaqja e planetit, dhe lëvizjet e tyre të brendshme mund të krijojnë ngarkesa elektrike.
Autori kryesor i studimit, Dr. Baptiste Chide, tha për agjencinë Reuters: “Këto shkarkime përbëjnë një zbulim madhor, me ndikim të drejtpërdrejtë në kimisë atmosferike të Marsit, klimën, jetueshmërinë dhe eksplorimet e ardhshme robotike dhe njerëzore.”
Ai dhe kolegët e tij në Institutin për Kërkime në Astrofizikë dhe Planetologji në Francë besojnë se Marsi tani i bashkohet Tokës, Saturnit dhe Jupiterit si planetet ku është vërejtur aktivitet elektrik atmosferik.
Fizikani i grimcave, Dr. Daniel Pritchard, shkroi në revistën shkencore Nature se, ndonëse regjistrimet “ofrojnë prova bindëse për shkarkime të shkaktuara nga pluhuri”, fakti që këto shkarkime u dëgjuan, por nuk u panë, “do të lërë patjetër vend për dyshim nëse kjo ishte vërtet rrufe marsiane”.
Ai shtoi: “Duke pasur parasysh historinë e këtij fushe, debati ka të ngjarë të vazhdojë për një kohë të gjatë.”
Në shtator të këtij viti, shkencëtarët zbuluan shkëmbinj me shenja të pazakonta në Mars.
Shenjat intriguese, të quajtura “njolla leopardi” dhe “fara lulëkuqeje”, përmbajnë minerale të prodhuara nga reaksione kimike që mund të lidhen me mikrobe të lashta.
Ekziston mundësia që këto minerale të jenë krijuar nga procese natyrore gjeologjike, por NASA deklaroi se këto shenja mund të jenë treguesit më të qartë të jetës së mundshme të zbuluar ndonjëherë.
Sot, Marsi është një shkretëtirë e ftohtë dhe e thatë. Por miliarda vite më parë, duket se ka pasur një atmosferë të dendur dhe ujë, çka e bën një vend premtues për kërkimin e gjurmëve të jetës së dikurshme.
Perseverance u dërgua në Kraterin Jezero sepse ai tregonte shenja se dikur mund të ketë pasur kushte të favorshme për jetë, përfshirë dëshmi se ka qenë një deltë kur Marsi mund të mbante ujë të lëngshëm në sipërfaqe. /Skyweb.al
