Ministri i Financave, Petrit Malaj, bëri publike për herë të parë afatet e zbatimit të taksës së re mbi pasuritë e paluajtshme, e cila pritet të kalojë në një fazë tranzitore deri në vitin 2026. Ai njoftoi se projektligji i ri për Taksën e Pasurisë është përfunduar dhe ka kaluar të gjitha fazat e konsultimit publik, ndërsa pritet t’i dërgohet shumë shpejt Këshillit të Ministrave për miratim.
Sipas tij, zbatimi i ligjit të ri do të nisë në vitin 2028 për ndërtesat, ndërsa në vitin 2030 për truallin.
Deklaratat u bënë gjatë eventit të mbylljes së projektit “ProTax Albania”, ku ministri theksoi rëndësinë e arritjeve të deritanishme dhe fazat e ardhshme të reformës.
“Sot, ne ndodhemi në një moment kyç. Kemi një sistem të ndërtuar dhe gati për t’u dorëzuar, një projektligj të hartuar sipas standardeve europiane, një bashkëpunim të konsoliduar me partnerët suedezë, dhe një vullnet të qartë institucional për të çuar përpara drejt fazës së fundit këtë reforme.”
Ai theksoi se deri në fund të vitit 2026 të gjitha bashkitë do të jenë të integruara në sistemin e Kadastrës Fiskale, çka përbën “parakushtin thelbësor për çdo hap të mëtejshëm”. Ndërkohë, në vitin 2027 do të realizohet vlerësimi kombëtar i pronave, ndërsa periudha 2026–2027 do të shërbejë si fazë tranzitore para hyrjes në fuqi të ligjit të ri.
“Në vitin 2028 parashikohet futja e vlerësimeve të bazuara në treg për ndërtesat, si dhe përmirësimi i normave dhe lehtësimeve. Dhe në vitin 2030 do të nisë zbatimi i takës mbi tokën/truall, bazuar në një sistem të plotë të integruar dhe sipas standardeve europiane. Ky do të jetë edhe finalizimi i reformës.”
Malaj rikujtoi se hartimi i projektligjit të ri për Taksën e Pasurisë ka përfunduar, pas një procesi të gjatë konsultimi publik, dhe është gati të kalojë për miratim në Këshillin e Ministrave.
“Sot, ne si Ministri e Financave, në bashkëpunim edhe me Agjencinë Suedeze për Zhvillim, përmbyllim një projekt tejet të rëndësishëm, siç është “ProTax Albania” e që ka të bëjë me reformën e Taksës së mbi Pronën. Ky projekt është i një rëndësie të veçantë dhe tërësisht në linjë me reformat që kjo qeveri po ndërmerr, edhe në kuadër të integrimit të vendit në Bashkimin Europian.”
Ai theksoi se objektivi i qeverisë është garantimi i një sistemi taksimi të drejtë dhe efikas për pronën, duke forcuar rolin e bashkive dhe duke krijuar një sistem të unifikuar sipas standardeve europiane.
“Zbatimi i një sistemi funksional, të unifikuar dhe sipas standardeve europiane edhe pse është një sfidë, është tërësisht i realizueshëm, ndaj dhe sot jemi këtu për të prezantuar rezultatet konkrete që kemi arritur.”
“Është e vërtetë që u deshën gati 7 vjet, pas një procesi shumë kompleks, që u vështirësua jo pak, për shkak të Tërmetit të vitit 2019, por edhe Pandemisë, për të arritur sot në këtë stad ku jemi.”
Ai nënvizoi se të ardhurat aktuale nga taksa e pronës arrijnë në rreth 0.3% të PBB-së, ndërkohë që vendet e rajonit mbledhin afërsisht 0.8%.
“Objektivi ynë është që ta çojmë peshën e kësaj takse në rreth 1% të PBB-së, në linjë edhe me standardet që kanë vendet e OECD-së. Ky objektiv është tërësisht i realizueshëm dhe ne kemi të gjithë potencialin e mundshëm për ta realizuar atë.”
Duke folur për pritshmëritë buxhetore, Malaj shtoi: “Natyrisht duhet një bashkëpunim akoma më i madh ndëristitucional me bashkitë dhe jo pa qëllim, për vitin 2026 parashikimi i të ardhurave nga taksa e pronës është në masën 10 miliardë ose rreth 100 milionë euro, një rritje prej rreth 1.4 miliardë lekë më shumë apo 14 milionë euro më shumë se sa në vitin 2025.”
