Sa vjeç është zemra juaj në të vërtetë? Ky informacion mund të jetë kyç për të vlerësuar rrezikun nga sëmundjet kardiovaskulare – infarktet dhe goditjet në tru – që vazhdojnë të jenë ndër shkaqet kryesore të vdekshmërisë. Studime të reja tregojnë se inteligjenca artificiale mund të analizojë elektrokardiogramet (EKG) dhe të përcaktojë “moshën biologjike” të zemrës. Një zemër që rezulton më e vjetër se mosha reale rrit rrezikun e ngjarjeve kardiake deri në 92%, ndërsa një zemër më e re e ul këtë rrezik deri në 27%.
Megjithatë, vlerësimi i shëndetit të zemrës nuk kërkon domosdoshmërisht teknologji të avancuar. Një vizitë te mjeku i familjes dhe matja e disa parametrave bazë mund të japin informacione thelbësore. Kjo përfshin kontrollin e presionit të gjakut, niveleve të kolesterolit dhe glicemisë. Kolesteroli LDL, i njohur si “i keqi”, mund të grumbullohet në muret e arterieve dhe të shkaktojë bllokime apo tromboza. Edhe matja e lipoproteinës (a) rekomandohet të bëhet të paktën një herë në jetë, pasi vlerat e larta lidhen me rrezik të shtuar kardiak. Gjithashtu, glicemia dhe markuesit e inflamacionit, si proteina C-reaktive dhe fibrinogjeni, janë të rëndësishëm për të parandalur komplikacione trombotike.
EKG-ja klasike dhe testi i ushtrimit ndihmojnë në zbulimin e aritmimeve dhe problemeve të qarkullimit të gjakut në muskulin e zemrës. Ekokardiograma dhe skaneri TAC i arterieve koronare përdoren për të vlerësuar funksionin e zemrës dhe gjendjen e arterieve, ndërsa inteligjenca artificiale mund të rrisë saktësinë e interpretimit të tyre.
Ekspertët rekomandojnë që kontrolli i kolesterolit dhe vlerësimi i shëndetit kardiak të nisë që në moshën 35–40 vjeç, i shoqëruar me monitorime të rregullta për të zbuluar herët dëmtimet e mundshme. Kujdesi i vazhdueshëm dhe një program i strukturuar kontrolli mund të reduktojnë rrezikun e sëmundjeve dhe të zgjasin jetëgjatësinë.
Meqenëse sëmundjet kardiovaskulare mbeten ndër shkaqet kryesore të vdekjes, një screening i hershëm dhe i zgjeruar është thelbësor për parandalimin e ngjarjeve fatale. Sipas specialistëve, menaxhimi i kombinuar i faktorëve metabolikë, shëndetit të veshkave dhe atij të zemrës është i domosdoshëm, pasi infarktet dhe goditjet në tru shpesh janë rezultat i një procesi të gjatë që nis me obezitetin, diabetin ose dëmtimin e funksionit renal.
