Pensioni shtetëror është ende i vetmi shpëtim financiar për shumicën e qytetarëve në Ballkanin Perëndimor në moshën e pleqërisë.
Një anketë e Këshillit të Bashkëpunimit Rajonal tregon se mbulimi me pension shtetëror është më i larti në Maqedoninë e Veriut, Bosnjë dhe Hercegovinë, Serbi dhe Shqipëri, ku tejkalon 60%.
Në të kundërt, Kosova shfaq nivele dukshëm më të ulëta mbulimi.
Të dhënat nënvizojnë se sistemi privat i pensioneve është ende i pazhvilluar në rajon. Maqedonia e Veriut mbetet përjashtimi i vetëm, me rreth 16% mbulim në vitin 2025, ndërsa në Shqipëri dhe vendet e tjera kjo normë nuk i kalon 10%.
Epërsia maqedonase lidhet me modelin me tre shtylla, që kombinon skemën shtetërore, një komponent privat të detyrueshëm të administruar nga fondet e licencuara dhe kursimet vullnetare.
Në Shqipëri, sipas Autoritetit të Mbikëqyrjes Financiare, fondet private të pensioneve kanë mbi 48 mijë anëtarë dhe administrojnë 14.3 miliardë lekë asete neto.
Megjithatë, pavarësisht rritjes së pjesëmarrjes, pjesa e kontribuesve në skemën private mbetet minimale. Vetëm 5.8% e kontribuesve të sigurimeve shoqërore derdhin njëkohësisht kontribute për një pension privat.
Panorama rajonale konfirmon se mbrojtja financiare e qytetarëve mbështetet thuajse tërësisht te skemat shtetërore. Sigurimet e detyrueshme gëzojnë pranim të gjerë, ndërsa ato vullnetare ose më të specializuara përdoren shumë pak.
Diferencat mes normave të përdorimit real dhe atyre të raportuara lidhen me njohuritë e kufizuara financiare si dhe me ngatërrimin e llojeve të sigurimeve nga qytetarët.
