Shqipëria ka hyrë zyrtarisht në sezonin e gripit. Autoritetet shëndetësore konfirmojnë se në vend po qarkullojnë disa viruse respiratore njëkohësisht, përfshirë gripin e tipit A, nëntipet A/H3 dhe A/H1, si dhe COVID-19.
Rastet e para të gripit janë shfaqur gjatë javëve të fundit dhe tregojnë se varianti A/H3, i njohur edhe si gripi “australian”, është më i përhapuri. Paralelisht, po evidentohen edhe raste me COVID-19, çka e bën situatën më të ndërlikuar gjatë sezonit dimëror.
Simptomat më të shpeshta janë temperaturë e lartë, ethe, dhimbje koke dhe muskujsh, lodhje, kollë dhe probleme me frymëmarrjen. Fëmijët, të moshuarit dhe personat me sëmundje kronike janë më të rrezikuarit për komplikacione, si bronkiti apo pneumonia.
Institucionet shëndetësore këshillojnë qytetarët të tregojnë kujdes, të shmangin ambientet e mbipopulluara në rast simptomash, të përdorin maska kur është e nevojshme dhe të kontaktojnë mjekun për çdo përkeqësim të gjendjes shëndetësore.
