Bordi i Transparencës ka vendosur rritjen me 5 lekë për litër të çmimit të naftës dhe benzinës, duke reflektuar një tjetër shtrenjtim të karburanteve në vend.
Sipas vendimit të marrë në mbledhjen e datës 30 prill 2026, çmimi i naftës për shitje me pakicë është përcaktuar në maksimum 208 lekë/litër, nga 203 lekë/litër që ishte më parë. Ndërkohë, benzina do të shitet me jo më shumë se 185 lekë/litër, nga 180 lekë/litër që ishte në vendimin e mëparshëm.
Për tregun me shumicë, Bordi ka vendosur që gazoili të shitet me jo më shumë se 196 lekë/litër, ndërsa benzina me jo më shumë se 173 lekë/litër.
Vendimi hyn në fuqi sot, më 30 prill, në orën 13:00 dhe do të mbetet në fuqi deri në një njoftim të ri, në varësi të zhvillimeve në tregjet ndërkombëtare.
Autoritetet u kanë bërë thirrje operatorëve të tregtimit të karburanteve që të zbatojnë detyrimisht çmimet e përcaktuara, duke paralajmëruar se në rast shkeljesh do të vendoset pezullimi i aktivitetit.
Në njoftim sqarohet gjithashtu se, bazuar në Aktin Normativ nr. 1, datë 3 prill 2026, niveli i reduktuar i akcizës prej 80% aplikohet vetëm kur çmimi i gazoilit kalon 220 lekë/litër ose benzina 200 lekë/litër.
Duke qenë se çmimet aktuale janë nën këto kufij, akciza do të vijojë të zbatohet në nivelin e plotë, 100%.
Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, deklarojnë se mbeten të angazhuara për mbrojtjen e konsumatorëve dhe garantimin e konkurrencës së ndershme në treg. /skyweb.al
