Një nismë që prej vitesh po zbatohet në disa zona të Italisë për të luftuar braktisjen e fshatrave dhe plakjen e popullsisë, po shtrihet tani edhe në rajonin e Veneto-s.
Administratat lokale kanë ofruar shtëpi me çmime simbolike, deri në 1 euro, me qëllim tërheqjen e banorëve të rinj dhe rigjallërimin e zonave të boshatisura.
Projekti i fundit vjen nga zona e Piccole Dolomiti, ku Unione Montana Pasubio, një bashkim komunash në provincën e Vicenza-s, ka hapur një thirrje të financuar nga fondet e PNRR në kuadër të programit Green Communities.
Sipas të dhënave zyrtare, janë identifikuar 385 objekte të braktisura, nga të cilat 24 janë përzgjedhur për t’u shitur me çmimin simbolik prej 1 euro. Pjesa më e madhe e tyre, 20 ndërtesa, ndodhen në Recoaro Terme, një qytet i vogël me rreth 5 mijë banorë.
Në këtë iniciativë përfshihen edhe zona të tjera si Valli del Pasubio dhe Posina, ku fenomeni i shpopullimit është edhe më i theksuar.
Interesi ka qenë i lartë, me 78 oferta konkrete për blerje dhe mbi 500 kërkesa për informacion, jo vetëm nga Italia, por edhe nga jashtë vendit.
Megjithatë, blerja e këtyre pronave nuk është pa kushte. Pronat janë shpesh në gjendje të amortizuar dhe kërkojnë investime të konsiderueshme për rikonstruksion.
Autoritetet theksojnë se nuk bëhet fjalë vetëm për një investim financiar, por për një zgjedhje jetese, që nënkupton ritëm më të ngadaltë, më pak shërbime dhe një përditshmëri më të thjeshtë.
Zonat ku zbatohet projekti ndodhen në një territor me vlera të larta natyrore në Dolomitet e Vogla, por që prej dekadash përballen me rënie të popullsisë.
Përveç peizazhit, këto zona mbartin edhe një histori të fortë, pasi kanë qenë pjesë e fronteve të Luftës së Parë Botërore, duke reflektuar një trashëgimi të lidhur me jetën në kushte të vështira dhe adaptimin e komuniteteve lokale. /skyweb.al
