Klubi i futbollit FK Tërbuni do të dalë në ankand më 7 korrik 2025, pasi Bashkia Pukë ka shpallur zyrtarisht shitjen e 100% të aksioneve të klubit. Vendimi vjen pasi duket nuk ka më mundësi financiare për të mbajtur klubin.
Aktualisht, Tërbuni garon në Kategorinë e Dytë, Grupi A, dhe ndodhet përballë një periudhe vendimtare për të ardhmen e tij institucionale dhe sportive. Sipas njoftimit zyrtar, vlera fillestare e ankandit është 5,200,000 lekë (pa TVSH), ndërsa procedura do të zhvillohet në formën e ankandit të hapur në ambientet e Bashkisë Pukë.
Të interesuarit mund të tërheqin dokumentacionin për pjesëmarrje kundrejt një pagese prej 1,000 lekësh, ndërsa afati i fundit për aplikim përkon me datën e zhvillimit të ankandit: 07.07.2025, ora 12:00.
Ky zhvillim nënvizon vështirësitë e shumta me të cilat përballen klubet e vogla në Shqipëri, veçanërisht ato që varen nga buxhetet e pushtetit vendor.
E ardhmja e Tërbunit do të varet tashmë nga interesi i investitorëve privatë për të ringritur ekipin dhe për t’i dhënë jetë një emri me traditë në futbollin shqiptar. /skyweb.al
