Kompania “Bankers Petroleum” ka reaguar zyrtarisht pas hetimeve që janë duke u zhvilluar ndaj disa prej drejtuesve dhe punonjësve të saj aktualë dhe të mëparshëm në Shqipëri, duke i cilësuar këto zhvillime si shqetësuese dhe duke paralajmëruar përballje ligjore në arbitrazh ndërkombëtar. Në një deklaratë publikuar në faqen zyrtare të kompanisë në rrjetet sociale, “Bankers” thekson se ndryshimi i kontrollit të aksioneve tek investitorët aktualë ka ndodhur që në shtator të vitit 2016, ndaj nuk mban përgjegjësi për veprimet e mundshme të mëparshme.
Sipas kompanisë, hetimet janë paraprirë nga muaj mbikëqyrjeje të komunikimeve telefonike dhe sekuestrime të sendeve personale dhe të punës të disa punonjësve, për të cilat “Bankers” shpreh shqetësim të thellë për mënyrën dhe proporcionalitetin e ndjekur nga autoritetet. “Këto masa kanë kulmuar me vendosjen e kufizimeve ndaj individëve dhe kompanisë,” thuhet në deklaratë, ku gjithashtu konfirmohet se janë angazhuar ekipe ligjore brenda dhe jashtë Shqipërisë për të përfaqësuar interesat e kompanisë, përfshirë para organeve ndërkombëtare të arbitrazhit.
“Bankers” rikujton se marrëveshjet e saj për operimin në Shqipëri dhe sistemi i “rikuperimit të kostove”, i cili është në qendër të hetimit penal, janë vlerësuar më parë në një vendim përfundimtar të një arbitrazhi të ICC-së në vitin 2024. Kompania thekson se po bashkëpunon plotësisht me autoritetet shqiptare dhe se të gjithë punonjësit kanë të drejtën për një proces të drejtë dhe përfaqësim ligjor të pavarur.
Deklarata vjen në një kohë kur autoritetet shqiptare kanë zbuluar një skemë të dyshuar abuzimi që ka sjellë miliona euro dëm në buxhetin e shtetit. Sipas Prokurorisë së Fierit, kompania ka shmangur detyrimet tatimore përmes deklarimit të humbjeve për gati 20 vite, pavarësisht se ka eksportuar dhe shitur brenda vendit mbi 532 miliardë lekë naftë nga viti 2004 deri në vitin 2024.
Hetimi ka rezultuar me 14 masa sigurimi, nga të cilat 9 janë ekzekutuar dhe 5 persona janë shpallur në kërkim. Ndaj zyrtarëve të përfshirë janë ngritur akuza për “fshehje të të ardhurave”, “pastrim parash”, “shpërdorim detyre” dhe “moskryerje detyrash nga organet tatimore”. Dëmi i dyshuar në buxhetin e shtetit përmes përfitimit fiktiv të TVSH-së llogaritet në miliona euro. /skyweb.al
