Qytetarët e Tiranës kanë tashmë mundësinë të ndjekin në kohë reale lëvizjen e autobusëve urbanë, duke parë itinerarin e plotë, qëndrimet në stacione dhe kohën e mbërritjes. Ky zhvillim i ri shënon një hap të rëndësishëm drejt modernizimit të transportit publik në kryeqytet dhe përmirësimit të përvojës së udhëtimit për qytetarët.
Falë bashkëpunimit mes atdalbania, GIZ Shqipëri dhe Bashkisë së Tiranës, me mbështetjen e partnerëve ndërkombëtarë, të dhënat GTFS-RT (General Transit Feed Specification në kohë reale) janë integruar për herë të parë në sistemet digjitale të transportit urban. Si rezultat, përdoruesit mund të planifikojnë më saktë lëvizjet e tyre dhe të shmangin pritjet e panevojshme në stacione.
Të dhënat janë tashmë të aksesueshme edhe përmes platformës Google Transit, duke i bërë itineraret dhe kohët e mbërritjes më të qasshme për të gjithë ata që lëvizin në qytet.
Përveç lehtësirave për pasagjerët, sistemi i ri ndihmon në menaxhimin e cilësisë së shërbimit, duke i mundësuar autoriteteve të analizojnë dhe optimizojnë rrjetet, oraret dhe frekuencat e linjave urbane. Kjo sjell më shumë efikasitet, më pak vonesa dhe një shërbim të përshtatur sipas nevojave reale të qytetit.
Sipas njoftimeve zyrtare, kjo teknologji po synohet të shtrihet edhe në qytete të tjera të Shqipërisë, si pjesë e një përpjekjeje më të gjerë për të bërë transportin publik më inteligjent, më të qëndrueshëm dhe më të aksesueshëm në të gjithë vendin./skyweb.al
