Duke filluar nga viti i ardhshëm qytetarët shqiptarë do të përdorin telefonat e tyre kur udhëtojnë në vendet e Bashkimit Europian me të njëjtat kosto sikurse i përdorin brenda vendit. Presidentja e Komisionit Europian, Ursula Von der Leyen, njoftoi se vitin e ardhsëm do të hiqen të gjitha tarifat e roamingut mes Shqipërisë dhe Bashkimit Europian.
“Kur folëm për projektin SEPA-n (Zona Unike e Pagesave në Euro), ai dukej një projekt ambicioz. Sot, përfshirja e Shqipërisë në këtë projekt është një arritje konkrete. Vitin që vjen do të hiqen të gjitha tarifat e roaming-ut mes Shqipërisë dhe BE-së. Kjo është një gjë shumë e mirë për biznesin, për turizmin dhe, veçanërisht, për të afruar popujt dhe njerëzit me njëri-tjetrin,” tha Von der Leyen para nisjes së punimeve të Forumit të Investimeve BE-Ballkani Përëndimor.
Von der Leyen theksoi se grupi i fundit i kapitujve negociues me Shqipërisë dhe BE-së pritet që të hapet gjatë kësaj vjeshte.
“Që të afrohemi me BE është që të bëjmë edhe një biznes të sigurt. Në të vërtetë dy vjet më parë ne lançuam planin e rritjes për Ballkanin Perëndimor sot ekonomia juaj ka fituar akses në tregon e përbashkët dhe investimeve të BE-së. Në këmbim ju zbatoni reforma kyç. Qëllimi është të dyfishojmë ekonominë e Ballkanit Perëndimor gjatë kësaj dekade. Ne shohim se kjo ka nisur të japë rezultatet e saj,” tha presidentja e Komisionit.
Ajo e ilustroi këtë progres me 3 shembuj.
“Shembulli i parë është që ju keni bërë progres në reformat kyçe. Jam shumë e kënaqur të them dhënien e 100 mln eurove. Shqipëria është në rrugën e duhur për të aksesuar gjithë fondin në bazën e planit të rritjes. Ndërsa në total janë 1 miliard euro në dispozicion,” tha Von der Leyen.
Kryeministri Edi Rama vlerësoi progresin e deritanishëm të Shqipërisë në negociatat për anëtarësim.
“Sot zhvilluam një konferencë të përbashkët për shtyp me Presidenten e Komisionit Europian, Ursula von der Leyen, ku diskutuam mbi ecurinë e procesit të negociatave të Shqipërisë me Bashkimin Europian një proces që po ecën me mbarësi dhe me ritëm të lartë. Gjithashtu, u ndalëm te Plani i Ri i Rritjes për Ballkanin Perëndimor, i cili do të financohet nga Bashkimi Europian në funksion të thellimit të reformave. Në këtë drejtim, morëm një vlerësim shumë pozitiv dhe riafirmuam angazhimin tonë për të përmbushur me përpikëri të gjitha detyrimet që kemi marrë përsipër,” përfundoi Rama. /kapitali.al
