Më 19 qershor, platforma ndërkombëtare e ndjekjes së fluturimeve “Flight Radar” regjistroi një rekord të ri në trafikun ajror global: mbi 24 mijë avionë ishin njëkohësisht në fluturim mbi planet.
Ky është një tregues domethënës i rritjes së pandalshme të udhëtimeve ajrore në shkallë botërore.
Sipas të dhënave të industrisë, çdo ditë nëpër aeroporte të ndryshme të globit realizohen mesatarisht rreth 100 mijë fluturime komerciale, që transportojnë miliona pasagjerë drejt destinacioneve të tyre.
Statistikat tregojnë se çdo minutë ngrihen rreth 70 avionë nga toka. Ndërsa aeroporti më i ngarkuar në botë, Hartsfield-Jackson në Atlanta të SHBA-ve, përpunon mbi 1 mijë ulje dhe ngritje avionësh në ditë, duke reflektuar ritmin e vrullshëm me të cilin funksionon aviacioni modern.
Ky rekord i ri vjen në një kohë kur sektori i aviacionit po i afrohet niveleve të parakrizës pandemike, me linjat ajrore që po rikthejnë fluturimet dhe pasagjerët që po zgjedhin gjithnjë e më tepër të udhëtojnë me avion./skyweb.al
