Paraja që qarkullon në Shqipëri ka arritur një nivel rekord prej 930.9 miliardë lekësh në muajin gusht, sipas të dhënave zyrtare të Bankës së Shqipërisë.
Në një hark kohor prej tre vitesh, ky tregues është rritur me rreth 16.5 për qind, duke reflektuar prirjen e lartë të përdorimit të parasë fizike në ekonomi.
Paraja në qarkullim përfshin totalin e kartëmonedhave dhe monedhave të emetuara nga Banka e Shqipërisë, të cilat përdoren nga qytetarët për pagesa të përditshme, si dhe një pjesë të fondeve të mbajtura në bankat tregtare, me përjashtim të depozitave.
Sipas agregatit M1, që mat paranë në qarkullim dhe depozitat e menjëhershme, shifra ka pësuar një rritje prej 13.7 për qind krahasuar me gushtin e vitit të kaluar. Por ajo që bie më shumë në sy është raporti mes parasë së përgjithshme në qarkullim dhe asaj jashtë bankave.
Nga 930.9 miliardë lekë të agregatit M1, 463.8 miliardë lekë, ose rreth 4.7 miliardë euro, ndodhen jashtë sistemit bankar, që përbën gati 49.8 për qind të totalit.
Vetëm gjatë një viti, sasia e parasë jashtë bankave është rritur me 11.8 për qind, çka tregon një prirje të fortë të ekonomisë drejt përdorimit të cash-it.
Edhe pse në këto përllogaritje nuk përfshihen kursimet që qytetarët mbajnë në depozita, shifrat dëshmojnë qartë se Shqipëria mbetet një ekonomi e varur nga paraja fizike, duke reflektuar nivel të ulët të pagesave elektronike dhe besim të kufizuar në sistemin financiar.
Në tërësi, treguesi më i gjerë i parasë, agregati M3, që përfshin paranë fizike, llogaritë rrjedhëse, depozitat dhe instrumentet e tregtueshme, ka arritur në 1.87 trilionë lekë, ose rreth 18.5 miliardë euro.
Brenda këtij totali, paraja jashtë bankave përbën 24.7 për qind, duke konfirmuar përmasat e mëdha të qarkullimit informal të parasë në ekonominë shqiptare. /skyweb.al
