Presidenti amerikan Donald Trump ka bërë një tjetër deklaratë të fortë, duke pretenduar se Rusia dhe Kina po zhvillojnë në fshehtësi teste nëntokësore të armëve bërthamore. Në një intervistë për emisionin “60 Minutes” me gazetaren Norah O’Donnell, Trump tha se të dy vendet kryejnë prova që nuk raportohen nga mediat e tyre dhe nuk dokumentohen nga komuniteti ndërkombëtar.
Gjatë bisedës, O’Donnell vuri në dukje se, sipas burimeve të saj, Rusia ka testuar vetëm sistemet e shpërndarjes së raketave, jo vetë kokat bërthamore. Megjithatë, Trump këmbënguli në qëndrimin e tij:
“Rusia po teston, edhe Kina po teston, por ata nuk flasin për këtë. I bëjnë testet thellë nën tokë. Ndihet një dridhje e lehtë, por askush nuk e di saktësisht çfarë po ndodh,” u shpreh ai.
Deklaratat e Trump vijnë pak ditë pasi presidenti rus Vladimir Putin njoftoi testimin e një torpedoje bërthamore me energji atomike dhe të një rakete të re lundrimi me të njëjtën teknologji. Paralelisht, Trump ka lënë të kuptohet se Shtetet e Bashkuara mund të rikthehen në testimet bërthamore, duke ngritur shqetësime mbi politikën e sigurisë globale dhe stabilitetin ndërkombëtar.
Këto komente kanë shkaktuar paqartësi në Uashington, pasi SHBA nuk ka kryer asnjë shpërthim bërthamor që nga viti 1992 dhe është pjesë e Traktatit të Ndalimit të Testeve Bërthamore (CTBT) që prej 1996-s. I pyetur nëse planifikon një test të tillë, Trump u përgjigj:
“Ne do të testojmë armët tona bërthamore, ashtu siç bëjnë vendet e tjera.”
Nga ana tjetër, Kina reagoi menjëherë duke mohuar pretendimet e Trump. Zëdhënësja e Ministrisë së Jashtme, Mao Ning, deklaroi se Pekini ka respektuar gjithmonë politikën e mbrojtjes paqësore dhe ka ndaluar testimet bërthamore që prej vitit 1996. Ajo i bëri thirrje SHBA-së të ruajë ekuilibrin strategjik global dhe të shmangë përshkallëzimin e tensioneve.
Ndërkohë, brenda administratës amerikane janë bërë përpjekje për të zbutur situatën. Sekretari i Energjisë, Chris Wright, sqaroi në Fox News se testet e përmendura nga Trump nuk përfshijnë shpërthime bërthamore, por vetëm prova jo-kritike të sistemeve të armëve, teste që nuk nxisin reaksione zinxhiri bërthamor ./Skyweb.al
