Rritja e pagave dhe pensioneve do të jetë prioriteti kryesor i qeverisë për vitin 2026. Ministri i Financave, Petrit Malaj, gjatë prezantimit të projektbuxhetit në Komisionin Parlamentar për Ekonominë dhe Financat, deklaroi se reforma e pensioneve është shtylla themelore e buxhetit të ri, që do të zbatohet nga janari 2026 deri në vitin 2030.
“Projektbuxheti synon rritjen e mirëqenies dhe mbrojtjes sociale për qytetarët. Totali i shpenzimeve për vitin 2026 arrin në 886.7 miliardë lekë, ndërsa një ndër objektivat kryesorë është modernizimi i infrastrukturës dhe forcimi i sistemit social,” – tha Malaj.
Sipas tij, rritja graduale e pensioneve do të nisë pas shpërndarjes së bonusit të fundvitit, duke sjellë përfitime mujore për të gjitha kategoritë:
1,800 lekë shtesë në muaj për pensionet urbane
800 lekë për pensionet e pjesshme urbane
1,000 lekë për pensionet rurale
700 lekë për pensionet familjare
600 lekë për pensionet e invaliditetit
Pas kësaj rritjeje, pensionet mesatare mujore do të arrijnë:
40 mijë lekë për pensionet urbane, 22 mijë për ato të pjesshme, 18 mijë për rurale dhe 30 mijë lekë për pensionet e invaliditetit. Sipas Ministrit, efekti financiar i kësaj mase arrin në 10.4 miliardë lekë.
Në fjalën e tij, Malaj theksoi gjithashtu rritjen e ndjeshme të pagës minimale, që do të jetë 50 mijë lekë nga 1 janari 2026, për të arritur në 60 mijë lekë në vitin 2028 dhe 70 mijë lekë deri në fund të mandatit.
“Do të ketë indeksim periodik të pagave publike në bazë të inflacionit, ndërsa paga mesatare e mësuesit do të rritet me 3 mijë lekë në muaj dhe ajo e mjekut do të arrijë në 143 mijë lekë,” – shtoi ministri, duke sqaruar se për këto ndërhyrje janë parashikuar 10 miliardë lekë shtesë nga buxheti.
Të ardhurat buxhetore për vitin 2026 pritet të jenë 823.1 miliardë lekë, ose 52.1 miliardë më shumë se një vit më parë, ndërsa të ardhurat nga taksat dhe kontributet do të rriten me 51.7 miliardë lekë.
“Ky buxhet i rikthen pensionistëve besimin dhe vlerësimin që meritojnë, ndërsa forcon stabilitetin ekonomik dhe social të vendit,” – deklaroi Malaj në përfundim të fjalës së tij. /skyweb.al
