Rusia prezantoi këtë javë robotin e saj të parë humanoid me Inteligjencë Artificiale, AIdol, një produkt i zhvilluar brenda vendit, por paraqitja e tij e parë publike nuk shkoi sipas pritjeve. Gjatë demonstrimit në Moskë, roboti humbi balancën dhe u rrëzua, duke nxjerrë në pah sfidat që vendi ka për të konkurruar me SHBA-të dhe Kinën në robotikë dhe AI. (Shih videon)
AIdol u shfaq për herë të parë të hënën, më 10 nëntor, në sallën Yarovit Hall. Ndërsa roboti filloi të ecte në skenë nën tingujt e kolonës zanore të filmit “Rocky”, ai përshëndeti publikun, por më pas humbi ekuilibrin dhe ra. Personeli mbuloi shpejt robotin me një copë të zezë dhe e largoi nga skena. CEO i kompanisë Idol, Vladimir Vitukhin, tha se incidenti mund të ketë ardhur nga mënyra se si kamerat stereo të robotit reaguan ndaj ndriçimit të sallës, duke e përshkruar ngjarjen si një “mësim në kohë reale që kthehet në përvojë”.
Roboti është zhvilluar për të përmbushur tre funksione kryesore: ecjen, manipulimin e objekteve dhe komunikimin me njerëzit. Ai mund të funksionojë deri në gjashtë orë pa u lidhur në internet, ndërsa fytyra e tij është në gjendje të shprehë 12 emocione bazë dhe qindra mikroekspresione falë lëkurës prej silikoni. Sipas kompanisë, 77% e komponentëve të AIdol janë prodhim vendas, me synimin që ky nivel të arrijë në 93% kur prodhimi të kalojë në shkallë të gjerë.
Për zhvillimin e teknologjisë ruse të robotikës, pengesë kryesore kanë qenë sanksionet perëndimore pas pushtimit të Ukrainës, të cilat kanë kufizuar aksesin në pajisje elektronike dhe teknologji të avancuara. Kjo është shoqëruar edhe me largimin e kompanive të huaja dhe mungesën e inxhinierëve të specializuar.
Përkundër përpjekjeve, prezantimi i AIdol tregon se Rusia ka ende një distancë të madhe nga liderët globalë. Robotë si Atlas i Boston Dynamics ofrojnë performancë shumë më të avancuar, ndërsa Kina po avancon me ritme të shpejta – një trend që, sipas Elon Musk, do të çojë Teslën dhe kompanitë kineze drejt dominimit të tregut të robotikës.
Presidenti Vladimir Putin ka theksuar në mënyrë të përsëritur rëndësinë e AI-së dhe robotikës për fuqinë globale dhe sigurinë e vendit. Në një deklaratë të vitit 2017, ai e cilësoi AI-në si “të ardhmen e njerëzimit”, duke paralajmëruar se ata që e udhëheqin këtë fushë do të kenë ndikim të konsiderueshëm ndërkombëtar. Në shkurt 2025, ai nënshkroi Strategjinë Kombëtare të Zhvillimit të AI deri në vitin 2030, duke theksuar se teknologjitë ruse të AI duhet të mbështeten në “vlerat kulturore dhe gjuhësore” të vendit, të cilat ai i përkufizoi si “inteligjencë artificiale sovrane.” /Skyweb.al
