Nga Gjermania vijnë njoftime për uljen e taksës së fluturimeve vitin e ardhshëm, një kërkesë e ngritur nga CDU/CSU. Politikani dhe njëkohësisht eksperti i transportit nga ky union, Stephan Stracke, deklaroi për Bild am Sonntag se nga kjo lëvizje do të përfitojnë drejtpërdrejt qytetarët. Sipas tij, ulja e taksave të aviacionit do të ndikojë në çmime më të ulëta të biletave.
“Çmimet e biletave duhet të bien. Kjo është ajo që pres nga linjat ajrore tani, sidomos nga Lufthansa”, u shpreh ai. Stracke shtoi se do të ishte ideale që kompanitë ajrore të nisnin uljen e çmimeve që para datës zyrtare të uljes së taksave, më 1 korrik 2026. Sipas tij, kjo do t’i bënte pushimet e verës së ardhshme më të lira dhe do të jepte një sinjal pozitiv për familjet, duke nxitur gjithashtu udhëtimet ajrore.
Industria e aviacionit ka kohë që ankohet për barrën e rëndë të taksave dhe tarifave. Për këtë arsye, drejtuesit e koalicionit qeverisës CDU/CSU dhe SPD ranë dakord të ofrojnë lehtësime. Taksa e trafikut ajror do të rikthehet në nivelin para rritjes së majit 2024 duke filluar nga 1 korriku 2026, duke sjellë një ulje të kostove prej rreth 350 milionë eurosh.
Gjithashtu, vitin e ardhshëm nuk do të ketë rritje të reja të tarifave të kontrollit të trafikut ajror. Parashikohet që këto tarifa të ulen me mbi dhjetë për qind deri në vitin 2029, ndërsa kostot për kontrollet e sigurisë në aeroporte do të reduktohen falë proceseve të përmirësuara dhe më efikase. /Skyweb.al
