Bashkimi Europian synon që brenda kësaj jave, para samitit të 18–19 dhjetorit, të miratojë një vendim për të ngrirë deri në 210 miliardë euro asete sovrane ruse deri në afat të pacaktuar, sipas “Financial Times”. Qëllimi është të shmanget rinovimi gjashtëmujor i regjimit të sanksioneve dhe kështu të neutralizohet kërcënimi i kryeministrit hungarez Viktor Orbán për veto.
Sipas gazetës, vendimi pritet të merret duke përdorur Nenin 122 të Traktatit të BE-së, i cili lejon miratimin e masave ekonomike emergjente me shumicë të kualifikuar, në vend të unanimitetit. Kjo lëvizje synon të mbrojë pozicionin negociues të Brukselit në procesin e paqes për Ukrainën, të udhëhequr nga SHBA-të.
Diplomatët thonë se është e rëndësishme që çështja e ngrirjes së aseteve të trajtohet veçmas nga debati i pritshëm për kreditë ndaj Kievit, të cilat do të mbështeten te fondet e ngrira ruse. Kjo çështje do t’i lihet vendimmarrjes së udhëheqësve të BE-së javën e ardhshme.
Megjithatë, vendimi i shpejtë rrezikon të shkaktojë pakënaqësi te Hungaria dhe disa shtete të tjera skeptike. Votimet me shumicë për tema të ndjeshme, si në rastin e politikave të migracionit, kanë tensionuar më parë marrëdhëniet brenda BE-së.
Komisioni Evropian propozoi së fundmi përdorimin e 210 miliardë eurove asete të ngrira ruse për të financuar një kredi prej rreth 90 miliardë eurosh për Ukrainën, që do të disbursohet gjatë dy viteve të ardhshme. Ky mekanizëm kërkon që asetet të mbeten të bllokuara për një periudhë të pacaktuar, duke shmangur nevojën për rinovim çdo gjashtë muaj.
Hungaria – vendi më i afërt me Moskën në BE – kundërshton çdo formë të re mbështetjeje për Ukrainën dhe kërcënon vazhdimisht me veto. Zëdhënësi i qeverisë, Zoltan Kovacs, deklaroi se propozimi i Komisionit “e kalon çdo vijë të kuqe”.
Sipas FT, konsolidimi i sanksioneve do të dërgonte një sinjal politik edhe për Uashingtonin, pasi një draft i hershëm i planit të paqes për Ukrainën parashikonte që pjesa më e madhe e aseteve të shkonin drejt dy fondeve investuese të drejtuara nga SHBA-të.
Ndërkohë, ministri i Jashtëm rus, Sergei Lavrov, paralajmëroi këtë mëngjes se Rusia do të reagojë ndaj çdo dislokimi trupash evropiane në Ukrainë. Moska kritikoi edhe deklaratat e presidentit ukrainas Volodymyr Zelensky për mbajtjen e zgjedhjeve nëse sigurohet mbështetje perëndimore, duke i cilësuar ato si “teatër kukullash”. Gjatë natës, ushtria ruse goditi rajonin e Odesës, duke shkaktuar dëme në infrastrukturë.
