Kanceri i qafës së mitrës është një nga format e kancerit që mund të parandalohet më së shumti.
Kontrollet e rregullta mjekësore mund të zbulojnë ndryshime të rrezikshme në qafën e mitrës shumë vite përpara se të shndërrohen në kancer. Megjithatë, sipas Shoqatës Amerikane të Kancerit (ACS), mbi 4,300 gra pritet të humbin jetën këtë vit në SHBA nga kjo sëmundje.
Pikërisht për këtë arsye, ACS ka bërë ndryshime të mëdha në mënyrën se si rekomandohet kontrolli i qafës së mitrës. Për herë të parë, gratë kanë mundësinë të marrin vetë mostrën e tyre në shtëpi për kontroll të HPV-së, virusit që shkakton shumicën e rasteve të kancerit të qafës së mitrës — pa qenë e nevojshme që ekzaminimi të kryhet patjetër nga mjeku, raporton CNN.
Kjo është e rëndësishme sepse kanceri i qafës së mitrës zakonisht nuk jep simptoma derisa të jetë në fazë të avancuar. Tani, me vetë-testimin e aprovuar si një alternativë e re, procesi i kontrollit bëhet më i lehtë dhe më i aksesueshëm. Shumë gra pyesin nëse vetë-testimi është po aq i saktë sa ai i kryer në klinikë, sa praktike është procedura dhe nëse mund të vazhdojnë të zgjedhin kontrollin tradicional te mjeku. Gjithashtu, shtrohet pyetja çfarë mund të bëhet tjetër për të ulur rrezikun e kësaj sëmundjeje.
Sipas doktoreshës Leana Wen, kanceri i qafës së mitrës shkaktohet kryesisht nga infeksioni afatgjatë me disa lloje të rrezikshme të HPV-së, një virus shumë i zakonshëm që transmetohet seksualisht. Shumë infeksione zhduken vetë, por kur HPV-ja me rrezik të lartë qëndron për një kohë të gjatë, ajo mund të dëmtojë qelizat e qafës së mitrës dhe me kalimin e viteve të shndërrohet në kancer.
Falë kontrolleve të rregullta, rastet e kancerit të qafës së mitrës në SHBA kanë rënë ndjeshëm krahasuar me dekada më parë. Megjithatë, qendrat amerikane për kontrollin e sëmundjeve raportojnë se çdo vit rreth 13,000 gra diagnostikohen me këtë sëmundje.
Qëllimi i ndryshimeve të reja është të nxisin më shumë gra të kryejnë kontrolle të rregullta, sepse zbulimi i hershëm mbetet mënyra më e sigurt për të parandaluar kancerin e qafës së mitrës.
