Fermerët gjermanë organizuan sot protesta duke bllokuar rrugët me autokolona traktorësh, në shenjë kundërshtimi ndaj çmimeve të ulëta të qumështit dhe gjalpit të vendosura nga zinxhirët e supermarketeve. Sipas tyre, këto çmime janë ulur në nivele të paqëndrueshme dhe po rrezikojnë mbijetesën e fermave.
Policia raportoi se rreth 140 mjete bujqësore u mblodhën përpara selisë së zinxhirit të supermarketeve “Lidl” në qytetin Bad Wimpfen, në jugperëndim të Gjermanisë, ndërsa organizatorët thanë se numri i traktorëve pjesëmarrës arriti deri në 250.
Çmimet e gjalpit në Gjermani ndodhen aktualisht në nivelin më të ulët të viteve të fundit, pas uljeve të përsëritura nga rrjetet e shitjes me pakicë. Sipas analistëve, rënie e çmimeve të gjalpit, qumështit dhe djathit po vërehet edhe në tregjet ndërkombëtare.
Ndërkohë, fabrikat e përpunimit të qumështit kanë pranuar më shumë qumësht krahasuar me të njëjtën periudhë të vitit të kaluar. Rritja e përmbajtjes së yndyrës ka ndikuar gjithashtu në krijimin e një teprice prodhimi, e cila po tejkalon kërkesën për gjalpë.
Përfaqësuesit e fermerëve paralajmërojnë se, në kushtet aktuale të çmimeve, shumë ferma nuk janë më në gjendje të përballojnë investimet e domosdoshme për vazhdimin e aktivitetit.
Në një peticion online, fermerët akuzuan zinxhirin “Lidl” për “dumping” të çmimeve të gjalpit. Protesta të ngjashme me traktorë u zhvilluan edhe përpara një qendre logjistike të kompanisë në Radeburg, në lindje të vendit, si dhe pranë magazinës qendrore në qytetin Cloppenburg, në veriperëndim të Gjermanisë.
Nga ana e saj, “Lidl” deklaroi se i kupton shqetësimet e fermerëve, por theksoi se uljet e çmimeve janë një reagim i domosdoshëm ndaj kushteve të jashtëzakonshme në tregun e lëndëve të para. /Skyweb.al
