Shpenzimet e shqiptarëve jashtë vendit kanë vazhduar të rriten gjatë vitit 2025, por jo për shkak të rritjes së kostos për udhëtar. Të dhënat e “Bankës së Shqipërisë” tregojnë se në periudhën Janar–Shtator 2025, shpenzimi mesatar për çdo dalje jashtë vendit ishte rreth 352 euro, pothuajse i njëjtë me nivelin e vitit 2024, që ishte 349 euro. Kjo tregon se shqiptarët po shpenzojnë të njëjtën shumë për çdo udhëtim, por po udhëtojnë më shpesh.
Gjatë nëntëmujorit të parë të vitit 2025, shpenzimet totale të shqiptarëve jashtë vendit arritën 2.3 miliardë euro, nga 2.09 miliardë euro në të njëjtën periudhë të vitit të kaluar.
Paralelisht, numri i daljeve jashtë vendit u rrit ndjeshëm, nga 5.9 milionë në vitin 2024 në 6.5 milionë dalje në vitin 2025. Rritja e shpenzimeve totale, pra, lidhet drejtpërdrejt me rritjen e frekuencës së udhëtimeve.
Tendenca e rritjes së lëvizjes jashtë vendit shpjegohet edhe me uljen e kostos së disa shërbimeve të udhëtimit, të ndikuara nga rënia e euros, si dhe me rritjen e udhëtimeve të shkurtra për punë, vizita familjare dhe qëllime turistike.
Këto udhëtime zakonisht shoqërohen me shpenzime të moderuara, çka mban të qëndrueshëm nivelin mesatar të shpenzimit për udhëtar.
Analiza e të dhënave tregon se rritja e shpenzimeve totale jashtë vendit është rezultat i volumit më të madh të udhëtimeve dhe jo i rritjes së buxhetit për çdo shqiptar që lë vendin. Kjo sjellje tregon se, pavarësisht ndryshimeve në çmime dhe kosto në vendet pritëse, ekonomia familjare po ruan një balancë të qëndrueshme në shpenzimet për lëvizjet ndërkombëtare gjatë vitit 2025. /skyweb.al
