Prokuroria e Posaçme publikoi sot detajet e plota për aksionin që çoi në vendosjen e tetë masave sigurie ndaj zyrtarëve të AKSHI-t, biznesmenëve dhe personave të tjerë të përfshirë në një skemë të dyshuar kriminale për manipulimin e tenderëve publikë.
Hetimet e SPAK po fokusohen edhe te një ngjarje më e rëndë: heqja e paligjshme e lirisë së biznesmenit Geron Meçe, i cili dyshohet se është detyruar të tërhiqej nga ankimimet për tenderat, duke hapur rrugën që kontratat t’u kalonin kompanive të parapërcaktuara.
SPAK konfirmon se procedimi penal nr. 20/1 i vitit 2025 ka në qendër akuza të rënda, të kryera në formën e grupit të strukturuar kriminal, përfshirë:
• Konkurrencë të paligjshme nëpërmjet dhunës
• Heqje të paligjshme të lirisë
• Shkelje të barazisë në tendera
• Grup të strukturuar kriminal
• Kryerje veprash nga organizata kriminale
• Pastrim të produkteve të veprës penale
Sipas hetimit, anëtarët e grupit kanë diktuar kriteret e tenderave për të favorizuar kompani të caktuara, kanë ushtruar presion dhe kërcënime ndaj operatorëve ekonomikë dhe kanë përdorur kompani të lidhura për lëshim faturash fiktive e transaksione të dyshimta. Rasti i Meçes është i dokumentuar si pjesë e kësaj skeme presioni dhe dhune.
MASAT E VENDOSURA NGA GJKKO
– Arrest në burg: Ergys Agasi, Ermal Beqiri
– Arrest në shtëpi: Mirlinda Karçanaj, Hava Delibashi
– Pezullim nga detyra dhe ndalim udhëtimi: Erion Ismaili, zv/drejtor i Policisë së Tiranës
– Ndalim udhëtimi: Andis Papa, Gëzim Hoxha, Rogers Rryta
SPAK thekson se Agasi dhe Beqiri dyshohen jo vetëm për manipulimin e tenderëve, por edhe për përfshirje të drejtpërdrejtë në skemën e presionit ndaj biznesmenëve, përfshirë heqjen e lirisë së Geron Meçes.
Karçanaj, drejtoresha e AKSHI-t, përballet me akuza për shkelje të barazisë në tendera dhe veprimtari kriminale të kryer në bashkëpunim me grupin. Hetuesit e BKH kanë kryer sot ekzekutimin e masave, ndërsa SPAK deklaron se hetimet do të vijojnë për të identifikuar persona të tjerë të përfshirë në skemë dhe për të dokumentuar plotësisht dëmet e shkaktuara në proceset e prokurimit publik.
Prokuroria konfirmon se skema dyshohet se ka funksionuar përmes dhunës, shantazhit dhe favorizimit sistematik të kompanive të lidhura me të dyshuarit, duke cenuar konkurrencën dhe integritetin e tenderëve shtetërorë. /skyweb.al
