Rregulli i njohur “gjysma e moshës plus shtatë” përdoret shpesh për të gjykuar nëse një lidhje me diferencë moshe është e pranueshme apo jo.
Sipas kësaj logjike, një 22-vjeçar mund të lidhet me një 18-vjeçare, ndërsa një 38-vjeçar jo me një 23-vjeçare, por me një 26-vjeçare po. Sa më i madh të jetë individi, aq më e gjerë bëhet diferenca e “lejuar” e moshës. Megjithatë, studimet tregojnë se realiteti është shumë më kompleks sesa ky rregull i trashëguar brez pas brezi.
Të dhënat e mbledhura nga Christian Rudder, bashkëthemelues i platformës OKCupid, tregojnë se burrat dhe gratë kanë pritshmëri të ndryshme kur bëhet fjalë për moshën e partnerit.
Gratë zakonisht kërkojnë burra të së njëjtës moshë ose pak më të mëdhenj, ndërsa burrat, pavarësisht moshës së tyre, priren të preferojnë gra në të njëzetat e hershme.
Ndërsa gratë preferojnë një diferencë të vogël dhe konstante moshe, burrat duket se priren drejt diferencave më të mëdha, sidomos sa më shumë rriten në moshë.
Nga pikëpamja teorike, ka argumente që favorizojnë diferencat e vogla të moshës. Partnerët e së njëjtës brez mund të ndajnë përvoja të përbashkëta kulturore, ritme të ngjashme jetese dhe sfida të njëjta në etapa të ndryshme të jetës.
Disa ekonomistë kanë sugjeruar se diferencat më të vogla të moshës mund të ndihmojnë edhe në ngushtimin e hendekut gjinor të të ardhurave, pasi çiftet ku burri është dukshëm më i madh në moshë mund të ushtrojnë presion indirekt mbi gratë për të hequr dorë nga karriera, sidomos pas lindjes së fëmijëve.
Megjithatë, studime konkrete, si ai mbi binjaket daneze, nuk kanë gjetur dallime domethënëse në të ardhurat e grave që u martuan me burra më të mëdhenj në moshë krahasuar me ato që u martuan me bashkëmoshatarë.
Edhe lidhja mes diferencës së moshës dhe divorcit mbetet e paqartë. Një studim amerikan i cituar në vitin 2014 sugjeronte se një diferencë prej pesë vitesh rrit me 18 për qind gjasat për divorc, por nuk provonte një lidhje shkak-pasojë. Studime të tjera, përfshirë ato të Zyrës Britanike të Statistikave, nuk gjetën një lidhje të fortë mes diferencës së moshës dhe divorcit, përveç disa rasteve specifike, si gratë mbi 30 vjeç që martoheshin me partnerë shumë më të rinj.
Ndikimi i diferencës së moshës bëhet më i dukshëm në pleqëri. Një studim i Universitetit të Stokholmit mbi persona mbi 50 vjeç në Danimarkë tregoi se burrat me bashkëshorte më të reja kishin jetëgjatësi më të madhe, ndërsa për gratë ndodhte e kundërta: sa më e madhe diferenca e moshës, aq më të ulëta ishin shanset e mbijetesës, pavarësisht nëse partneri ishte më i ri apo më i vjetër.
Studiuesit sugjerojnë se kjo lidhet me mënyrën se si gratë dhe burrat mbështeten tek partnerët në moshë të thyer.
Në përfundim, provat ekzistuese duket se mbështesin zgjedhjet tipike të përdoruesve të platformave të takimeve: gratë priren të zgjedhin partnerë afër moshës së tyre, ndërsa burrat më të rinj.
Megjithatë, studiuesit theksojnë se asnjë rregull i thjeshtë nuk mund të shpjegojë plotësisht suksesin ose dështimin e një lidhjeje.
Në fund, zgjedhjet mbeten personale dhe rregullat “popullore” mund të injorohen pa pasoja, për sa kohë që vendimet merren me vetëdije. /skyweb.al
