Pijet pa alkool me përmbajtje të lartë sheqeri dhe pijet alkoolike po kontribuojnë ndjeshëm në rritjen e obezitetit, diabetit dhe sëmundjeve të tjera, njoftoi sot Organizata Botërore e Shëndetësisë (OBSH).
Sipas OBSH-së, fëmijët dhe të rinjtë janë grupet më të prekura nga ky fenomen. Deklarata u bë pas publikimit të dy raporteve globale nga organizata me seli në Gjenevë.
OBSH rekomandon vendosjen e taksave të reja ose rritjen e taksave ekzistuese për këto pije, me qëllim rritjen e çmimit të tyre dhe uljen e konsumit. Njëkohësisht, këto masa do të sillnin më shumë të ardhura për sistemet shëndetësore.
“Taksat për shëndetin janë një nga mjetet më të fuqishme që kemi për të promovuar shëndetin dhe për të parandaluar sëmundjet”, deklaroi drejtori i përgjithshëm i OBSH-së, Tedros Adhanom Ghebreyesus.
Të dhënat e OBSH-së tregojnë se 116 vende tashmë aplikojnë taksa për pijet freskuese dhe pijet e tjera me sheqer. Megjithatë, shumë produkte me përmbajtje të lartë sheqeri ende nuk tatohen, përfshirë lëngjet 100% frutash, pijet e qumështit të ëmbëlsuara, si dhe kafenë dhe çajin e gatshëm për konsum.
Organizata vëren gjithashtu se të paktën 25 vende, kryesisht në Evropë, përfshirë Gjermaninë, nuk zbatojnë taksa akcize për verën.
Ndërkohë, pijet e forta alkoolike si rakia e frutave, konjaku, vodka dhe uiski i nënshtrohen taksës së alkoolit, ndërsa birra tatohet me një taksë të veçantë.
“Konsumi i alkoolit mund të çojë në dhunë, lëndime dhe sëmundje të rënda”, paralajmëroi drejtori i OBSH-së për parandalimin e sëmundjeve, Etienne Krug. /skyweb.al
