Kryeministri Edi Rama ka paralajmëruar ndërhyrje ligjore pas zhvillimeve të fundit në Gjykatën Kushtetuese pas rastit Balluku, duke theksuar se çështja ka nxjerrë në pah një problem parimor që lidhet me funksionimin e shtetit dhe ndarjen e pushteteve.
Pas një mbledhjeje me Grupin Parlamentar të Partisë Socialiste, Rama u shpreh se situata e krijuar në Kushtetuese nuk mund të trajtohet si një rast i izoluar. Sipas tij, funksionet e padelegueshme kushtetuese, nga ai i anëtarit të qeverisë tek ai i Presidentit të Republikës dhe jo vetëm, nuk mund të pezullohen kurrësesi nga askush duke u nisur nga një emër përveçëm, sepse pezullimi paralizon funksionin, pra institucionin që ai ose ajo drejton.
Kryeministri theksoi se nga leximi i deklaratës publike të Gjykatës Kushtetuese rezulton se anëtarët e saj janë unanimë për ekzistencën e problemit, por të ndarë sa i përket rrugëzgjidhjes. Në këtë kontekst, Rama bëri të ditur se shumica qeverisëse do të angazhohet për zgjidhjen e situatës përmes ndërhyrjes në legjislacion, me qëllim qartësimin e kufijve mes pushteteve kushtetuese.
Sipas tij, ndërhyrja ligjore nuk synon të cenojë drejtësinë apo të ndikojë në hetimet penale, por të garantojë funksionimin normal të institucioneve dhe respektimin e parimeve kushtetuese. Rama theksoi se SPAK-u vijon të ketë liri të plotë për të kryer hetimet përkatëse, pa asnjë pengesë nga debati institucional i krijuar.
Kryeministri nënvizoi se mazhoranca e sheh këtë proces si një domosdoshmëri për të shmangur precedentë që mund të paralizojnë institucionet dhe të krijojnë paqartësi në raportet mes pushteteve. Sipas tij, ndërhyrja ligjore synon të forcojë pavarësinë kushtetuese të pushtetit ekzekutiv dhe legjislativ, duke garantuar njëkohësisht funksionimin e drejtësisë.
