Pas disa ditësh bllokimi për shkak të shembjes së segmentit rrugor, aksi Librazhd-Prrenjas pritet të rikthehet pjesërisht në funksion përmes një rruge alternative.
Autoriteti Rrugor Shqiptar njoftoi se kalimi do të hapet nesër në orën 12:00, duke lejuar lëvizjen nga një krah në tjetrin për të gjitha kategoritë e mjeteve.
Sipas njoftimit zyrtar, rruga alternative do të jetë e aksesueshme si për automjetet e vogla ashtu edhe për mjetet e transportit të pasagjerëve dhe kamionët, duke lehtësuar ndjeshëm qarkullimin në këtë aks të rëndësishëm që lidh juglindjen me pjesën tjetër të vendit.
Hapja e kalimit pritet të reduktojë vonesat dhe devijimet e gjata që janë krijuar ditët e fundit, ndërsa ndërhyrjet për stabilizimin përfundimtar të segmentit të dëmtuar vijojnë paralelisht. /skyweb.al
