Një sulm i ri ndaj një cisterne nafte pranë Ngushticës së Hormuzit ka rritur sërish tensionet në një nga zonat më të rëndësishme për furnizimin global me energji, ndërsa incidenti ka shkaktuar një viktimë dhe ka shtuar pasigurinë në transportin detar.
Cisterna MKD VYOM, me flamurin e Ishujve Marshall, u godit nga një mjet detar pa pilot rreth 96 kilometra larg brigjeve të Omanit. Sipas autoriteteve detare të vendit, sulmi shkaktoi një shpërthim në dhomën e motorëve dhe një zjarr në bord, ku humbi jetën një anëtar i ekuipazhit.
استهداف ناقلة نفط شمال غرب ميناء السلطان قابوس وإخلاء طاقمها بعد اندلاع حريق. pic.twitter.com/SO6LlkFhV9
— مركز الأمن البحري| MARITIME SECURITY CENTRE (@OMAN_MSC) March 2, 2026
Në anije ndodheshin gjithsej 21 persona nga disa shtete, të cilët u evakuuan me ndihmën e një anijeje tregtare që kalonte në zonë.
Autoritetet po monitorojnë gjendjen e anijes dhe kanë paralajmëruar mjetet e tjera që kalojnë në atë korridor detar, ndërsa nuk është bërë ende e ditur se kush qëndron pas sulmit.
Incidenti vjen vetëm pak ditë pas një tjetër sulmi ndaj një cisterne në të njëjtën zonë, duke treguar një rritje të rrezikut për transportin e energjisë në rajon.
Ngjarja ka ndikuar menjëherë në tregjet ndërkombëtare, ku çmimet e naftës janë rritur, pasi investitorët i druhen ndërprerjes së furnizimeve nga Lindja e Mesme.
Ndërkohë, kompanitë e mëdha të transportit detar kanë pezulluar kalimet në Ngushticën e Hormuzit, duke devijuar anijet në rrugë alternative për arsye sigurie.
Të dhënat e trafikut detar tregojnë se lëvizja e anijeve në këtë korridor është ulur ndjeshëm dhe shumë cisterna kanë qëndruar në pritje në ujërat e Gjirit.
Edhe pse nuk ka një bllokadë zyrtare, aktiviteti tregtar është ngadalësuar dukshëm, duke rritur frikën për ndikim në furnizimin global me naftë dhe gaz nëse situata nuk stabilizohet. /skyweb.al
