Dhimbja kronike, lodhja dhe çrregullimet e gjumit janë ndër simptomat kryesore të endometriozës që ndikojnë ndjeshëm në cilësinë e jetës së grave. Një studim i realizuar nga Universiteti Katolik i Milanos, i publikuar në revistën BMC Psychology, tregon se kjo sëmundje ka pasoja serioze edhe në arsim dhe karrierë.
Sipas kërkimit të udhëhequr nga studiuesja Federica Facchin, në bashkëpunim me Universitetin e Milanos dhe Fondacionin IRCCS Ca’ Granda Policlinico, deri në një në katër gra me endometriozë përballen me vështirësi në shkollim dhe punësim, veçanërisht kur simptomat shfaqen që në adoleshencë dhe diagnoza vonohet.
Studimi përfshiu 971 gra italiane dhe sugjeron se rreth 306 mijë gra në Itali mund të hasin pengesa në arsim, ndërsa rreth 396 mijë të tjera përballen me kufizime në jetën profesionale për shkak të sëmundjes.
Endometrioza karakterizohet nga rritja e indeve të ngjashme me endometriumin jashtë mitrës dhe shpesh diagnostikohet me vonesë prej 5 deri në 12 vjetësh. Ajo prek rreth 5% deri në 10% të grave në moshë riprodhuese, por përqindja rritet ndjeshëm te gratë me infertilitet, dhimbje kronike pelvike dhe adoleshentet me simptoma të ngjashme.
Rezultatet tregojnë se rreth një në gjashtë paciente përjeton rënie në performancën akademike. Tek ato që kanë pasur simptoma që në moshë të re dhe janë diagnostikuar me vonesë, situata është më e rëndë: 55% raportojnë mungesa të shpeshta në shkollë, 38% rënie në rezultate dhe 34% vështirësi në përgatitjen për provime për shkak të dhimbjes.
Në aspektin profesional, rreth 22% e grave raportojnë ndikim negativ në karrierë, ndërsa kjo shifër rritet në 28% për ato me fillim të hershëm të simptomave dhe diagnozë të vonuar.
Sipas përllogaritjeve të bazuara në të dhënat e Institutit të Shëndetit Publik në Itali, rreth 1.8 milion gra jetojnë me endometriozë, duke e bërë këtë një problem të rëndësishëm shëndetësor dhe social që kërkon më shumë ndërgjegjësim dhe diagnostikim të hershëm. /skyweb.al
