Kreu i Prokurorisë së Posaçme, Klodian Braho, ka raportuar në Këshillin e Lartë të Prokurorisë mbi punën e SPAK për vitin 2025, duke nxjerrë në pah një element të ri në hetimet financiare: konfiskimin e kriptomonedhave në vlera të konsiderueshme.
Gjatë raportimit, Braho deklaroi se në kuadër të procedimeve të ndjekura nga SPAK janë konfiskuar rreth 12.4 milionë euro në kriptovaluta. Megjithatë, ai theksoi se kjo kategori asetesh paraqet sfida konkrete për institucionin, veçanërisht në drejtim të administrimit dhe ruajtjes së tyre.
Sipas tij, natyra e paqëndrueshme e kriptomonedhave bën që vlera e tyre të ndryshojë ndjeshëm në një kohë shumë të shkurtër, çka krijon vështirësi për menaxhimin efektiv të tyre pas konfiskimit. “Kemi problematikë për administrimin e kriptomonedhave të konfiskuara. Po punohet për miratimin e kuadrit ligjor për administrimin e tyre. Shpresojmë që së shpejti kjo të rregullohet, që të mund të administrohen portofolet e kriptovalutave sepse lidhet edhe me vënien e tyre në punë, kjo pasi janë shifra që mund të kenë ndryshime drastike në një kohë shumë të shkurtër”, u shpreh Braho.
Deklarata e tij nxjerr në pah një boshllëk ligjor dhe praktik në trajtimin e aseteve digjitale të sekuestruara, në një kohë kur përdorimi i kriptomonedhave në aktivitetet kriminale po bëhet gjithnjë e më i përhapur.
Në të njëjtën kohë, Braho preku edhe një tjetër çështje që lidhet me fokusin e hetimeve të SPAK, duke sugjeruar rishikimin e fashës së vlerës për rastet e korrupsionit që trajtohen nga institucioni, duke lënë të kuptohet se aktualisht po hetohen edhe raste me vlera relativisht të ulëta, si 50 mijë lekë.
Raportimi i kreut të SPAK tregon se, përveç goditjes së korrupsionit dhe krimit të organizuar, sfidat e reja për institucionin lidhen gjithnjë e më shumë me menaxhimin e pasurive të sekuestruara në formate të reja, siç janë kriptomonedhat. /skyweb.al
