Ryanair ka njoftuar se do të mbyllë bazën e saj në Berlin duke filluar nga 24 tetori, si pasojë e rritjes së kostove operacionale dhe taksave aeroportuale. Shtatë avionët që aktualisht operojnë nga aeroporti i Berlinit do të zhvendosen në baza të tjera në Evropë, përfshirë Suedinë, Sllovakinë, Shqipërinë dhe Italinë.
Kompania irlandeze sqaroi se, pavarësisht mbylljes së bazës, do të vazhdojë të ofrojë fluturime drejt dhe nga Berlini, por me kapacitet më të reduktuar dhe duke përdorur avionë të vendosur në aeroporte të tjera evropiane.
Vendimi vjen në një periudhë të vështirë për industrinë ajrore, e cila po përballet me rritjen e ndjeshme të çmimeve të karburantit dhe pasiguritë e krijuara nga tensionet gjeopolitike në Lindjen e Mesme. Sipas Ryanair, një nga arsyet kryesore të largimit nga Berlini është rritja e vazhdueshme e tarifave aeroportuale, të cilat janë shtuar me mbi 50% vitet e fundit. Për më tepër, aeroporti i Berlinit ka njoftuar një tjetër rritje prej 10% të taksave, që do të hyjë në fuqi në vitin 2027.
Kompania thekson se trafiku i pasagjerëve në Berlin ka rënë ndjeshëm krahasuar me periudhën para pandemisë. Nga 36 milionë udhëtarë në vitin 2019, numri ka zbritur në vetëm 26 milionë në vitin 2025.
Kjo nuk është hera e parë që Ryanair mbyll baza në Gjermani. Më herët, kompania ka ndërmarrë të njëjtin hap edhe në aeroportet e Frankfurt Hahn dhe Frankfurt, gjithashtu për shkak të kostove të larta operative. Industria ajrore në Gjermani po përballet me sfida të mëdha, ndërsa edhe Lufthansa ka njoftuar së fundmi masa shtrënguese, përfshirë anulimin e mijëra fluturimeve dhe ristrukturimin e operacioneve të saj.
