Mungesa e fuqisë punëtore në turizëm vijon të mbetet një nga problemet kryesore edhe për sezonin veror 2026, duke detyruar bizneset në jug të vendit të rrisin pagat dhe të ofrojnë kushte shtesë për të tërhequr punonjës.
Sipas të dhënave nga agjencitë e ndërmjetësimit të punësimit, të cilave iu referohet Monitor, hotelet, restorantet dhe baret në zona si Ksamili, Saranda dhe Dhërmi po kërkojnë masivisht punonjës për shërbime bazë, si sanitare dhe pjatalarëse, me paga që arrijnë deri në 1200 euro në muaj.
Pozicionet më të kërkuara mbeten ato të pastrimit dhe shërbimit ndihmës. Sanitaret në hotele dhe resorte paguhen nga 100 mijë deri në 120 mijë lekë në muaj, ndërsa pjatalarëset arrijnë deri në 120 mijë lekë. Në zona të tjera si Shkëmbi i Kavajës kërkohen edhe punonjës për shërbime plazhi me paga deri në 80 mijë lekë.
Përveç pagës, shumica e bizneseve ofrojnë akomodim dhe ushqim falas, në një përpjekje për të kompensuar mungesën e fuqisë punëtore në treg.
Drejtues të agjencive të punësimit raportojnë se ofertat këtë vit janë rritur me rreth 20% krahasuar me një vit më parë, ndërsa kërkesa mbetet e lartë, sidomos në zonat turistike të Vlorës, Sarandës dhe Potamit.
Sipas tyre, një pjesë e punonjësve që më parë emigronin për punë sezonale jashtë vendit, po zgjedhin të punojnë në Shqipëri për paga që variojnë nga 800 deri në 1000 euro në muaj, duke e bërë më të leverdishëm qëndrimin në vend.
Megjithatë, tregu mbetet i paekuilibruar. Rreth 75% e kërkesës së bizneseve është për punonjës vendas, ndërsa 25% mbulohet nga punëtorë të huaj, çka tregon mungesën e ofertës së brendshme.
Edhe gjatë sezonit të kaluar, pagat në sektorin e shërbimeve arritën nivele të larta, duke shkuar deri në 250 mijë lekë për pozicione të specializuara si kuzhinierët. Rritja e pagave, sipas përfaqësuesve të sektorit, është rezultat i një tregu të deformuar, ku kërkesa për punëtorë është e lartë, ndërsa oferta mbetet e kufizuar dhe shpesh pa trajnim profesional.
Pavarësisht rritjes së pagave dhe përmirësimit të kushteve, bizneset në turizëm vijojnë të përballen me të njëjtin problem çdo vit: mungesën e stafit të mjaftueshëm për të përballuar fluksin në rritje të turistëve.
