Inspektorati Kombëtar i Mbrojtjes së Territorit ka gjobitur kompaninë “Gjikuria”, pas konstatimit të një venddepozitimi të paligjshëm mbetjesh inerte dhe dherash në pjesën e sipërme të fshatit turistik të Dhërmiut.
Sipas IKMT, gjatë inspektimit të kryer nga Drejtoria Qendrore u konstatua se kompania po depozitonte dhera të dala nga gërmimet, pa qenë e pajisur me Leje Mjedisi të tipit B.
Për këtë shkelje, ndaj subjektit është vendosur gjobë në vlerën 1,000,000 lekë (rreth 11 000 euro). Po ashtu, IKMT ka urdhëruar pezullimin e aktivitetit të depozitimit deri në pajisjen e kompanisë me lejen përkatëse, sipas legjislacionit në fuqi.
Kompania është detyruar gjithashtu të rehabilitojë zonën dhe të eliminojë pasojat e krijuara në mjedis brenda një afati të përcaktuar nga inspektorët.
Rasti është konstatuar në një nga zonat më të frekuentuara të bregdetit jugor, ku hedhja e dherave dhe mbetjeve inerte krijon jo vetëm ndotje mjedisore, por edhe impakt të rëndë vizual në prag të sezonit turistik.
Ndërhyrja e IKMT vjen ndaj një prej kompanive më të mëdha të ndërtimit në vend. “Gjikuria” është përfituese ndër vite e kontratave të shumta publike, projekteve infrastrukturore dhe investimeve me vlera të mëdha, duke u përmendur shpesh në debatin publik për raportet e saj me institucionet shtetërore.
Megjithëse gjoba prej 1 milion lekësh mbetet modeste në raport me peshën e kompanisë dhe vlerat e projekteve që ajo ka përfituar, vendimi i IKMT e detyron subjektin të ndalojë depozitimin e mbetjeve dhe të rikthejë zonën në gjendjen e mëparshme.
Mbetet për t’u parë nëse masa do të zbatohet deri në fund, apo nëse do të mbetet një penalizim formal për një problem që në zona turistike si Dhërmiu ka ndikim të drejtpërdrejtë në mjedis, imazh dhe cilësinë e sezonit turistik.
