Vendimet u morën gjatë mbledhjes së Asamblesë së PS në Durrës, ku në fokus ishte ristrukturimi i organizimit vendor dhe përgatitja për fazën e ardhshme politike.
Ndryshimi më i fortë është në Shkodër, ku Benet Beci është hequr nga detyra e drejtuesit politik dhe është zëvendësuar nga Enea Karakaçi. Beci ndodhet aktualisht nën akuzë nga SPAK për një tender rreth 700 mijë euro dhe dosja ndaj tij, së bashku me disa zyrtarë të tjerë, është në gjykim në GJKKO.
Lëvizje është bërë edhe në Durrës, ku Emirjana Sako është larguar nga posti i drejtueses politike. Ajo është kallëzuar në SPAK për situatën e përmbytjeve të janarit 2026, me akuza për shpërdorim detyre në bashkëpunim dhe dyshime për keqmenaxhim fondesh.
Paralelisht me largimet, Rama ka emëruar një listë të re drejtuesish politikë në qarqe, duke shpërndarë përgjegjësitë mes figurave kryesore të mazhorancës.
Në Tiranë janë vendosur Ogerta Manastirliu, Taulant Balla dhe Damian Gjiknuri, ndërsa në Fier Belinda Balluku. Blendi Klosi merr drejtimin politik të Durrësit, ndërsa Arbjan Mazniku në Elbasan dhe Bledi Çuçi në Vlorë.
Në qarqet e tjera janë emëruar Niko Peleshi në Korçë, Ulsi Manja në Dibër, Ermal Nufi në Lezhë, Mirela Kumbaro në Gjirokastër dhe Erjon Malaj në Kukës.
Ndërkohë, Elisa Spiropali dhe Eduart Shalsi pritet të marrin role në një nga njësitë administrative të kryeqytetit.
Ristrukturimi vjen në një moment sensitiv, ku disa prej emrave të larguar janë përfshirë në hetime, duke sinjalizuar një lëvizje politike që ndërthuret me zhvillimet në drejtësi. /skyweb.al
