Biznesmeni Behgjet Pacolli ka reaguar publikisht për situatën në Aeroportin e Vlorës, duke kërkuar ndërhyrjen e institucioneve kompetente për zhbllokimin e punimeve.
Në një deklaratë publike, Pacolli thotë se që prej datës 18 maj 2026, punimet në aeroport janë penguar nga veprime të një grupi personash, të cilat sipas tij bien në kundërshtim me ligjin dhe me vendime gjyqësore të formës së prerë.
“Që prej datës 18 Maj 2026, punimet në Aeroportin e Vlorës janë penguar dhe bllokuar nga veprime të ndërmarra nga një grup personash, të cilat, sipas vlerësimit tonë, bien në kundërshtim me ligjin dhe me vendime gjyqësore të formës së prerë të Gjykatës së Apelit dhe të Gjykatës së Lartë”, shprehet Pacolli.
Sipas tij, kjo situatë po shkakton dëme të konsiderueshme ndaj interesit publik, ekonomisë, komunitetit lokal dhe investitorit koncesionar MABCO. Pacolli thotë se kompania ka marrë përsipër barrën financiare të projektit, me një angazhim që, sipas deklaratës, tejkalon vlerën 310 milionë euro, përmes injeksioneve kapitale, punimeve dhe garancive financiare.
Ai shton se vonesat në përfundimin dhe vënien në operim të aeroportit po sjellin pasoja për zhvillimin ekonomik të rajonit dhe për imazhin e Shqipërisë si vend për investime strategjike.
Në deklaratë, Pacolli pretendon se vonesat nuk burojnë nga investitori, por nga veprime dhe procedura që, sipas tij, kanë sjellë vendime kontradiktore dhe të kontestuara juridikisht nga gjykata të shkallës së parë. Ai shprehet se kjo ka krijuar pasiguri juridike dhe ka cenuar parimet e hierarkisë së vendimeve gjyqësore.
“Vendime të tilla, të mbështetura nga veprime të personave të caktuar dhe të formalizuara përmes akteve gjyqësore përkatëse, përbëjnë shkakun kryesor të dëmeve ekonomike të sipërpërmendura”, thuhet në deklaratë.
Pacolli kërkon që organet e rendit, Prokuroria dhe institucionet përgjegjëse të ndërmarrin veprimet e nevojshme për zhbllokimin e punimeve, zbatimin e vendimeve gjyqësore të formës së prerë dhe verifikimin e çdo veprimi apo mosveprimi që ka kontribuar në krijimin e kësaj situate.
Ai shton se çdo person që ka vepruar në kundërshtim me ligjin, ka shpërdoruar kompetencat apo ka penguar zbatimin e vendimeve gjyqësore, duhet të mbajë përgjegjësi sipas legjislacionit në fuqi.
Në fund të deklaratës, MABCO shprehet e gatshme të bashkëpunojë me autoritetet shtetërore dhe të vendosë në dispozicion dokumentacionin dhe informacionin e nevojshëm për zbardhjen e çështjes.
