Një nga pronat më ikonike të ish-kryeministrit italian Silvio Berlusconi ka kaluar në duar të reja. Bëhet fjalë për Villa Certosa, rezidencën luksoze në Sardenjë, e cila sipas raportimeve është blerë nga ish-kryeministri dhe ish-ministri i Jashtëm i Katarit, Hamad bin Jassim bin Jaber Al Thani, për shumën prej 350 milionë eurosh.
Lajmi u publikua nga e përditshmja italiane La Repubblica, e cila shkruan se marrëveshja u mbyll rreth një vit pasi familja Berlusconi vendosi ta nxirrte pronën në shitje.
E vendosur përballë Gjirit të Marinelës, Villa Certosa ishte shumë më tepër sesa një rezidencë pushimi. Gjatë viteve kur Berlusconi drejtonte qeverinë italiane, ajo shërbeu si një rezidencë verore jozyrtare ku u pritën liderë politikë, biznesmenë dhe personalitete të njohura nga mbarë bota.
Megjithatë, vila u bë e famshme edhe për organizimin e festave të njohura si “bunga-bunga”, të cilat tërhoqën vëmendjen e mediave ndërkombëtare dhe u kthyen në objekt hetimesh që përfshinë Berlusconin dhe bashkëpunëtorët e tij.
Hetimet lidhen me akuza për korrupsion dhe shpërdorim detyre, ndërsa në qendër të tyre ishin pretendimet për përfshirjen e vajzave të reja në këto aktivitete. Edhe pse Berlusconi u shpall i pafajshëm, çështja mbeti një nga episodet më të debatueshme të jetës së tij politike.
Në raportimin e La Repubblica përmendet edhe Nicole Minetti, ish-higjieniste dentare dhe figurë televizive, e cila u dënua për rolin e saj në sigurimin e grave që merrnin pjesë në këto evente. Emri i saj është rikthyer sërish në vëmendjen e opinionit publik italian gjatë muajve të fundit.
Sipas mediave italiane, blerja e Villa Certosa është realizuar përmes një kompanie investimesh me seli në Luksemburg, e lidhur me familjen Al Thani. Dinastia që drejton Katarin prej më shumë se një shekulli e gjysmë ka shtuar ndjeshëm investimet në Itali, veçanërisht në Sardenjë.
Përveç sektorit të turizmit luksoz, familja Al Thani ka investime të rëndësishme edhe në shëndetësi, ku spikat spitali Mater Olbia, një nga projektet më të mëdha të realizuara në ishull.
Shitja e Villa Certosa konsiderohet si një tjetër hap në procesin e administrimit të trashëgimisë së Silvio Berlusconit, i cili u nda nga jeta në vitin 2023. Që prej atëherë, trashëgimtarët e tij kanë vijuar zbatimin e testamentit dhe menaxhimin e pasurive të krijuara gjatë dekadave në politikë, biznes dhe media.
Ndër përfituesit kryesorë të testamentit janë ish-partnerja Marta Fascina dhe vëllai i tij Paolo Berlusconi, të cilët kanë përfituar nga 100 milionë euro secili. Me shitjen e Villa Certosa mbyllet një kapitull i rëndësishëm i historisë së një prej figurave më të njohura dhe më kontraverse të Italisë moderne.
