Operatorët që kanë në zhvillim ose në funksion impiante për depozitimin e energjisë duhet të njoftojnë dhe të regjistrohen pranë Entit Rregullator të Energjisë brenda 60 ditëve.
Kërkesa vjen pas hyrjes në fuqi të ligjit nr. 59/2026 “Për sektorin e energjisë elektrike”, i cili vendos për herë të parë rregulla të posaçme për licencimin dhe administrimin e impianteve të akumulimit të energjisë.
Detyrimi prek subjektet që aktualisht kanë impiante me bateri në ndërtim ose në operim, por nuk disponojnë një licencë të veçantë për këtë aktivitet.
Sipas ligjit, këto impiante do të lejohen të vijojnë përkohësisht aktivitetin mbi bazën e licencës ekzistuese, por operatorët duhet të aplikojnë për licencën përkatëse brenda 12 muajve.
ERE mund të zbatojë procedura të thjeshtuara për pajisjen me licencë të subjekteve ekzistuese, me qëllim kalimin e tyre në regjimin e ri ligjor.
Pas regjistrimit, rregullatori mund të kërkojë dokumente dhe të dhëna shtesë për kapacitetin, teknologjinë, vendndodhjen dhe mënyrën e operimit të impianteve.
Të dhënat do të përdoren për krijimin dhe administrimin e Regjistrit të Impianteve të Depozitimit të Energjisë.
Ligji përcakton se aktiviteti i depozitimit mund të kryhet vetëm nga persona fizikë ose juridikë të licencuar, përveç rasteve të veçanta të parashikuara në dispozitat kalimtare.
Operatorët duhet të plotësojnë gjithashtu kriteret teknike, të sigurisë dhe të funksionimit që zbatohen për subjektet e tjera të licencuara në sektorin elektrik.
Rregullat e reja vijnë në një kohë kur po rritet interesi për instalimin e baterive pranë parqeve fotovoltaike.
Akumulimi u mundëson prodhuesve të ruajnë energjinë gjatë orëve kur prodhimi diellor është i lartë dhe ta shesin atë më vonë, kur kërkesa dhe çmimi në treg janë më të favorshme.
ERE u ka kërkuar të gjitha subjekteve që përfshihen në këtë kategori të respektojnë afatin 60-ditor, ndërsa mosregjistrimi mund t’i vendosë përballë masave të parashikuara në ligjin e ri.
