Shqipëria vijon të ketë peshën më të lartë të shpenzimeve për ushqime në raport me ekonominë, duke lënë pas vendet e Bashkimit Europian dhe ato të rajonit.
Sipas të dhënave të Eurostat, të përpunuara nga “Monitor”, në vitin 2025 shpenzimet për ushqime arritën në 20.4% të Prodhimit të Brendshëm Bruto, nga 20.5% një vit më parë.
Kjo do të thotë se një vlerë e barabartë me rreth një të pestën e ekonomisë shqiptare përdoret për blerjen e ushqimeve.
Shqipëria renditet mbi Malin e Zi, ku ushqimet zinin 19.9% të PBB-së, dhe Bosnjë-Hercegovinën me 19.1%.
Diferenca me Bashkimin Europian është shumë e madhe, pasi mesatarja e 27 vendeve të BE-së ishte vetëm 6.2%. Pra, pesha e shpenzimeve për ushqime në Shqipëri është mbi tri herë më e lartë se mesatarja europiane.
Një nga arsyet kryesore lidhet me çmimet e larta të ushqimeve në raport me të ardhurat e qytetarëve.
Në vitin 2025, çmimet e ushqimeve në Shqipëri ishin 2.9% mbi mesataren e Bashkimit Europian.
Një shportë që kushton mesatarisht 100 euro në BE, në Shqipëri kushton rreth 103 euro, e matur sipas fuqisë blerëse. Ndërkohë, të ardhurat për frymë të shqiptarëve mbeten më pak se gjysma e mesatares europiane.
Të dhënat tregojnë se familjet shqiptare vazhdojnë të përdorin pjesën më të madhe të buxhetit për nevojat bazë, duke pasur më pak mundësi për shpenzime në arsim, shëndetësi, transport, kulturë dhe argëtim. /skyweba.al
