Dubai, i njohur për luksin, kullat futuriste dhe aeroportin që lidh Lindjen me Perëndimin, nuk po shkëlqen më si dikur. Përshkallëzimi i konfliktit në Lindjen e Mesme ka dëmtuar ndjeshëm imazhin e qytetit si një destinacion i sigurt për turistët dhe bizneset ndërkombëtare.
Finnair është kompania e fundit që ka vendosur të anulojë të gjitha fluturimet ndërmjet Helsinkit dhe Dubait për sezonin dimëror. Linja do të mbetet e pezulluar nga 25 tetori 2026 deri më 27 mars 2027.
“Situata e sigurisë në Lindjen e Mesme ka mbetur e paqëndrueshme, pa shenja të qarta përmirësimi”, deklaroi kompania finlandeze, e cila do të kontaktojë pasagjerët e prekur nga anulimet.
Por Finnair nuk është e vetme. Sipas një pasqyre të publikuar nga Reuters, Wizz Air i ka pezulluar fluturimet nga Europa kontinentale drejt Dubait dhe Abu Dhabit deri më 24 tetor, ndërsa KLM ka hequr nga programi fluturimet drejt Dubait deri në të njëjtën datë. Air Canada, ndërkohë, i ka shtyrë fluturimet drejt Dubait të paktën deri në mesin e janarit 2027.
Goditja nuk është kufizuar vetëm te transporti ajror. Në javën e parë të konfliktit u raportuan mbi 80 mijë anulime rezervimesh akomodimi në Dubai, ndërsa linjat turistike MSC Cruises dhe Celestyal anuluan lundrimet e planifikuara nga Dubai dhe Abu Dhabi.
Kriza ka prekur edhe simbolin kryesor të qytetit: luksin. Shitjet e markave të shtrenjta në “Mall of the Emirates” ranë me 30–50% gjatë marsit krahasuar me një vit më parë. Dyqane të shumta në Dubai u mbyllën përkohësisht ose punuan me staf minimal.
Madje aeroporti ndërkombëtar, ishulli artificial Palm Jumeirah dhe hoteli ikonë Burj Al Arab pësuan dëmtime nga mbetjet e dronëve të interceptuar gjatë sulmeve të muajit mars.
Dubai mbetet një nga qendrat më të rëndësishme të aviacionit dhe turizmit botëror, por seria e anulimeve, rënia e rezervimeve dhe pasiguria rajonale po zbehin imazhin që qyteti kishte ndërtuar për dekada: atë të një strehe luksoze, të qëndrueshme dhe të paprekshme nga konfliktet e Lindjes së Mesme.
