Ministria e Mjedisit ka miratuar rregulla të reja për llogaritjen e kostove që shkaktohen nga dëmet mjedisore, duke zbatuar parimin “ndotësi paguan”.
Operatori përgjegjës mund të detyrohet të mbulojë jo vetëm rehabilitimin e zonës së dëmtuar, por edhe shpenzimet për inspektime, analiza laboratorike, marrje mostrash dhe studime teknike.
Në faturë mund të përfshihen edhe ekspertët, laboratorët e specializuar dhe shpenzimet e autoriteteve për monitorimin e dëmit.
Rregullat parashikojnë gjithashtu rikuperimin e kostove administrative, si dhe të shpenzimeve ligjore dhe gjyqësore që lidhen drejtpërdrejt me përgjegjësinë mjedisore.
Në rast rreziku të menjëhershëm, mund të urdhërohet edhe ndërprerja e aktivitetit, ndalimi i shkarkimeve apo izolimi i burimit të ndotjes.
Zbatimi i masave të rehabilitimit lidhet me hyrjen në fuqi të akteve përkatëse nënligjore për përgjegjësinë mjedisore. /skyweb.al
