Qytetarët që janë përfshirë në një proces gjyqësor për një pronë duhet të regjistrojnë kërkesë-padinë edhe në Regjistrin e Pasurive të Paluajtshme. Agjencia Shtetërore e Kadastrës sqaron se ky veprim bën që pretendimet mbi pronën të pasqyrohen në të dhënat zyrtare të saj.
Aplikimi kryhet në portalin e-Albania, përmes shërbimit “Aplikim për regjistrimin e kërkesë-padisё – B4”. Pas përfundimit të procedurës, padia regjistrohet në seksionin “E – Informacione të tjera për pronën” të kartelës së pasurisë.
Qytetarët duhet të paraqesin kërkesë-padinë, vërtetimin e gjykatës për regjistrimin e saj dhe të dhënat e pronës, nëse ato nuk janë përfshirë në padi. Dokumentet ngarkohen në formatin PDF, ndërsa pagesa mund të bëhet online, në Postën Shqiptare ose në bankat e nivelit të dytë.
Dokumentacioni origjinal duhet të dërgohet më pas me postë pranë drejtorisë vendore të Kadastrës që administron zonën ku ndodhet prona. Regjistrimi i padisë shërben për të bërë të dukshëm konfliktin juridik mbi pasurinë përpara çdo veprimi të mëtejshëm me të. /skyweb.al
