Alkooli mund të ketë një rol shumë më të madh nga sa mendohej në vdekjet e shkaktuara nga disa lloje kanceri.
Një studim i ri zbulon se pesha e alkoolit në vdekshmërinë nga kanceri është rritur ndjeshëm gjatë tri dekadave të fundit në Shtetet e Bashkuara.
Sipas studiuesve, përqindja e vdekjeve nga kanceri që lidhen me konsumimin e alkoolit u rrit me më shumë se 58% te personat mbi 20 vjeç gjatë periudhës 1990–2023.
Në këto 33 vite, numri vjetor i vdekjeve nga kanceri të lidhura me alkoolin u dyfishua, duke kaluar nga 11 361 në vitin 1990 në 23 126 në vitin 2023.
Rreziku përfshin kancerin e gjirit, prostatës, zorrës së trashë, rektumit, stomakut, pankreasit dhe mëlçisë, si edhe tumoret e kokës, qafës dhe ezofagut.
Studimi paralajmëron se nuk nevojitet domosdoshmërisht konsum i lartë për të rritur rrezikun.
Sipas autorit kryesor, doktor Chinmay Jani, edhe konsumimi i rreth një gote standarde alkooli çdo ditë mund të ndikojë në shtimin e tij.
Te personat nga 20 deri në 54 vjeç, kanceri kolorektal rezultoi shkaku kryesor i vdekjeve të lidhura me alkoolin te burrat dhe shkaku i dytë te gratë.
Te këto të fundit, në vend të parë renditej kanceri i gjirit.
Burrat dhe personat mbi 55 vjeç pësuan ndikimin më të madh. Te burrat e kësaj grupmoshe, norma e vdekshmërisë nga kanceret e lidhura me alkoolin u rrit me afro 24%. Kanceri i mëlçisë kishte lidhjen më të fortë, i ndjekur nga kanceri i ezofagut dhe ai kolorektal.
Te gratë mbi 55 vjeç, kanceri i gjirit ishte shkaku kryesor i këtyre vdekjeve, i ndjekur nga kanceri i mëlçisë dhe ai kolorektal.
Studiuesit vlerësojnë se te gratë dhe burrat nën 55 vjeç nevojitet një sasi më e vogël alkooli për të rritur rrezikun, krahasuar me burrat më të moshuar.
Alkooli shpërbëhet nga mëlçia në acetaldehid, një substancë potencialisht kancerogjene, e cila mund të dëmtojë ADN-në dhe të pengojë riparimin e saj.
Ai ndryshon gjithashtu nivelet hormonale, përfshirë estrogjenin, duke ndikuar në rrezikun e kancerit të gjirit.
Konsumimi i alkoolit shkakton stres oksidativ dhe inflamacion, dobëson qelizat e gojës dhe fytit dhe pengon përthithjen e vitaminave A, C, D dhe E, si edhe të folateve.
Rreziku bëhet edhe më i lartë kur alkooli shoqërohet me pirjen e duhanit.
Studimi, i publikuar në revistën shkencore “The Lancet Regional Health – Americas”, analizoi të dhënat e mbledhura për më shumë se tri dekada.
Autorët theksojnë se ulja e konsumit të alkoolit në nivelin më të ulët të mundshëm është zgjedhja më e mirë për shëndetin.
Industria amerikane e pijeve alkoolike e kundërshtoi megjithatë përfundimin se nuk ekziston një nivel i sigurt konsumimi, duke argumentuar se marrëdhënia mes alkoolit dhe shëndetit është më komplekse. /skyweb.al
