Sistemi i ri digjital i hyrje-daljeve në Bashkimin Evropian (EES) po shkakton probleme për udhëtarët nga vendet jashtë BE-së. Disa prej tyre rrezikojnë të konsiderohen gabimisht si persona që kanë tejkaluar afatin e lejuar të qëndrimit, për shkak të mosregjistrimit të daljes nga zona Schengen, raporton Euronews.
Alarmi është ngritur nga organizata britanike për mbrojtjen e konsumatorëve “Which?”, e cila ka marrë dhjetëra ankesa nga udhëtarë që pretendojnë se largimi i tyre nga territori Schengen nuk është regjistruar në sistem.
EES nisi zbatimin në tetor 2025 dhe u bë plotësisht i detyrueshëm më 10 prill 2026 në 29 vende evropiane. Sistemi zëvendëson vulat tradicionale në pasaporta me regjistrimin elektronik të hyrjeve dhe daljeve.
Ai zbatohet në vendet e BE-së, me përjashtim të Irlandës dhe Qipros, si dhe në Islandë, Norvegji, Zvicër dhe Lihtenshtajn.
Qëllimi i sistemit është të identifikojë automatikisht personat që tejkalojnë afatin e lejuar të qëndrimit, i cili për shtetasit e vendeve jashtë BE-së është 90 ditë brenda një periudhe 180-ditore.
Megjithatë, mosregjistrimi i daljes mund të krijojë një situatë problematike: sistemi vazhdon të llogarisë ditët e qëndrimit edhe pasi udhëtari është larguar nga zona Schengen.
Një rast i tillë i ka ndodhur edhe shkrimtares britanike Jojo Moyes, autore e romanit të njohur “Me Before You”. Pas një udhëtimi në Portugali në muajin maj, ajo zbuloi në tetor, gjatë mbërritjes në Marsejë, se largimi i saj nga zona Schengen nuk ishte regjistruar.
Për këtë arsye, autoritetet e paralajmëruan se mund të përballej me një gjobë deri në 10 mijë euro dhe ndalim hyrjeje për dy vjet, nëse problemi nuk zgjidhej.
Sipas “Which?”, dhjetëra udhëtarë kanë raportuar raste të ngjashme. Çështja i është paraqitur edhe Komisionit Evropian, nga i cili pritet një reagim zyrtar.
Çfarë duhet të bëjnë udhëtarët në rast gabimesh në EES?
Udhëtarët që vërejnë pasaktësi në të dhënat e tyre, si numër të gabuar të ditëve të qëndrimit apo mungesë të regjistrimit të daljes, këshillohen të kontaktojnë autoritetin përgjegjës për mbrojtjen e të dhënave në vendin ku dyshohet se ka ndodhur gabimi.
Në kërkesën për korrigjim duhet të përfshihen:
Një kopje e pasaportës.
Biletat e avionit, autobusit ose trenit që dëshmojnë largimin nga zona Schengen.
Dokumente të tjera që mund të vërtetojnë datën dhe vendin e largimit.
Ekspertët rekomandojnë që udhëtarët të ruajnë me kujdes të gjitha dokumentet e udhëtimit dhe të kontrollojnë regjistrimet elektronike, në mënyrë që të shmangin penalizime të padrejta apo probleme gjatë udhëtimeve të ardhshme në Evropë. /skyweb.al
