Kontrolli i Lartë i Shtetit ka zbuluar shkelje serioze në procedurat e prokurimit publik të Bashkisë Durrës, ku kompani janë shpallur fituese edhe pse nuk kishin provuar përmbushjen e kritereve të detyrueshme të tenderëve.
Sipas raportit të KLSH-së, konsultuar nga skyweb.al, janë audituar 27 procedura prokurimi, me fond limit të përgjithshëm prej 2.85 miliardë lekësh, ose rreth 30 milionë euro, nga të cilat në 10 raste janë konstatuar probleme me kualifikimin e operatorëve fitues.
Pavarësisht se kompanitë nuk kishin provuar plotësimin e të gjitha kërkesave të përcaktuara në dokumentet e tenderit, Komisionet e Vlerësimit të Ofertave i kanë konsideruar ato të kualifikuara, duke u hapur rrugën për shpalljen fituese.
KLSH vlerëson se këto veprime janë në kundërshtim me ligjin për prokurimin publik, duke cenuar parimet e konkurrencës, transparencës dhe trajtimit të barabartë të operatorëve ekonomikë.
Shkeljet nuk kufizohen vetëm te faza e vlerësimit të ofertave.
Në shtatë nga 27 procedurat e kontrolluara, audituesit kanë evidentuar edhe kritere kualifikimi të paargumentuara, joproporcionale ose që nuk përputheshin me objektin e kontratave.
Kjo do të thotë se në disa tendera problemi ka nisur që në hartimin e kushteve të garës, ndërsa në të tjerë ka vijuar me kualifikimin e kompanive që nuk kishin dokumentuar plotësimin e kërkesave.
Shkelje edhe në tenderat e shkollave dhe rindërtimit të pallateve
Mes procedurave të identifikuara nga KLSH janë investime me vlera të konsiderueshme për ndërtimin e shkollave, riforcimin e pallateve dhe rehabilitimin e infrastrukturës publike.
Në listë përfshihet tenderi për riaftësimin strukturor të pallateve nr. 8 dhe 10 në rrugën Pelikan, me fond limit 291.3 milionë lekë, si dhe ndërtimi i shkollës 9-vjeçare Vadardh në Sukth, me fond limit 268.8 milionë lekë.
Një tjetër procedurë problematike është ndërtimi i shkollës 9-vjeçare “Met Hasa”, me fond limit 241.9 milionë lekë.
Të dy tenderat e shkollave janë evidentuar nga audituesit si në grupin e procedurave me probleme në kriteret e kualifikimit, ashtu edhe në atë të vlerësimit të operatorëve fitues.
Probleme janë konstatuar gjithashtu në tenderin për riaftësimin strukturor të pallatit “Big Kristi”, me fond limit 156.4 milionë lekë, dhe atë të një pallati në rrugën Iljaz Reka, me fond limit rreth 119 milionë lekë.
Listës i shtohen tenderat për rehabilitimin e rrugës së Dëshmorëve deri te Stacioni i Trenit, ndriçimin e akseve rrugore, shëtitoren Taulantia dhe rikualifikimin e hapësirave publike në lagjet 13 dhe 6.
Në procedurën për shëtitoren Taulantia, KLSH evidenton ndër të tjera se një nga kompanitë e bashkimit fitues nuk dispononte licencën e kërkuar për kategorinë përkatëse të punimeve, ndërsa personel dhe mjete të deklaruara rezultonin të angazhuara edhe në një kontratë tjetër.
Audituesit kanë identifikuar probleme të ngjashme në dokumentimin e kapaciteteve teknike edhe në procedura të tjera.
KLSH kërkon masa disiplinore edhe për nënkryetarin e Bashkisë Durrës
Për shkeljet e evidentuara, Kontrolli i Lartë i Shtetit ka rekomanduar nisjen e procedurave disiplinore ndaj punonjësve dhe drejtuesve përgjegjës të administratës bashkiake.
Mes personave të përfshirë në rekomandimet e auditimit figuron edhe një zëvendëskryetar i Bashkisë Durrës, Gentian Kallmi., në cilësinë e anëtarit të Komisionit të Vlerësimit të Ofertave.
KLSH kërkon që të shqyrtohen masa disiplinore që variojnë nga vërejtja deri në largimin nga puna, në varësi të përgjegjësive individuale dhe shkeljeve të konstatuara.
Në total, rekomandimet për masa disiplinore përfshijnë 15 punonjës dhe drejtues në marrëdhënie pune, ndërsa auditimi evidenton shkelje edhe për 17 ish-punonjës që nuk janë më pjesë e administratës.
KLSH nuk konstaton automatikisht përgjegjësi penale për këta persona, por kërkon që bashkia të analizojë shkeljet dhe të ndjekë procedurat përkatëse administrative.
30 milionë lekë dëm ekonomik edhe nga punimet e paguara
Problemet me prokurimet shoqërohen edhe me një tjetër gjetje të rëndësishme financiare.
Nga kontrolli i zbatimit të kontratave të punëve publike, KLSH ka identifikuar diferenca ndërmjet volumeve të punimeve të faturuara dhe atyre të realizuara, duke përllogaritur 30.35 milionë lekë dëm dhe penalitete kontraktore të paarkëtuara.
Një pjesë e konsiderueshme e këtyre diferencave është konstatuar në kontratat për riforcimin dhe rikonstruksionin e pallateve në Durrës.
Audituesit kanë kërkuar marrjen e masave ligjore për rikuperimin e shumave nga operatorët ekonomikë përkatës.
Në përfundim, raporti ngre pikëpyetje serioze mbi mënyrën si janë administruar fondet publike nga Bashkia Durrës, si janë përcaktuar kriteret e tenderëve dhe mbi çfarë baze janë shpallur fituese kompani që nuk kishin provuar plotësimin e të gjitha kushteve të garës.
Gjetjet e KLSH-së kërkojnë sqarimin e përgjegjësive të komisioneve të prokurimit dhe strukturave drejtuese të bashkisë, si edhe verifikimin e masave të marra për zbatimin e rekomandimeve të auditimit. /skyweb.al
