Punonjësit e restoranteve, supermarketeve, fabrikave ushqimore dhe bizneseve të tjera që konstatojnë produkte të rrezikshme për shëndetin mund të bashkëpunojnë me Autoritetin Kombëtar të Ushqimit (AKU), pa u penguar apo dekurajuar nga punëdhënësit.
Ky detyrim përcaktohet shprehimisht në projektligjin e ri “Për ushqimin”, të përgatitur nga Ministria e Bujqësisë dhe të shqyrtuar nga Skyweb.al, i cili forcon përgjegjësinë e operatorëve për sigurinë e produkteve që vendosin në treg.
Ligji i ri ndalon bizneset ushqimore të pengojnë ose dekurajojnë çdo person që bashkëpunon me autoritetet kompetente për parandalimin, zvogëlimin ose eliminimin e rreziqeve që vijnë nga ushqimet.
Në praktikë, dispozita përfshin situata kur një punonjës konstaton se në një supermarket tregtohen ushqime të prishura, në një fabrikë përdoren lëndë të para të kontaminuara apo në një restorant nuk respektohen kushtet e sigurisë ushqimore.
Në këto raste, punonjësi mund të informojë inspektorët për shkeljet e konstatuara, ndërsa drejtuesit e biznesit nuk lejohen ta pengojnë ose dekurajojnë bashkëpunimin e tij me autoritetet.
Formulimi i projektligjit nuk kufizohet vetëm te marrëdhëniet e punës, pasi detyrimi për të mos penguar bashkëpunimin zbatohet ndaj çdo personi që mund të ndihmojë në parandalimin e një rreziku ushqimor.
Gjobat deri në 250 mijë lekë për shkeljen e përgjegjësive
Projektligji parashikon edhe sanksione për mosrespektimin e detyrimeve të operatorëve ushqimorë.
Sipas nenit 41, shkronja “f”, shkelja e përgjegjësive të përcaktuara në pikën 3 të nenit 24, ku përfshihet edhe ndalimi i pengimit të bashkëpunimit me autoritetet, dënohet me gjobë nga 150 mijë deri në 250 mijë lekë.
Megjithatë, projektligji nuk përcakton në këtë dispozitë një mekanizëm të posaçëm që garanton anonimitetin e personit që jep informacion apo mbrojtjen e tij nga pushimi në punë.
Çështje të tilla do të duhet të trajtohen sipas legjislacionit përkatës për marrëdhëniet e punës dhe mbrojtjen e sinjalizuesve, kur plotësohen kushtet e zbatimit të tij.
Nga ana tjetër, ligji ngarkon edhe vetë bizneset me detyrimin që të njoftojnë menjëherë autoritetet nëse kanë arsye të besojnë se një produkt i vendosur në treg mund të dëmtojë shëndetin e konsumatorëve.
Nëse ushqimi ka dalë nga kontrolli i operatorit dhe rezulton i pasigurt, ai duhet të nisë procedurat për tërheqjen nga tregu dhe, kur është e nevojshme, të informojë konsumatorët që e kanë blerë. /skyweb.al















