Kryeministri Edi Rama ka zhvilluar këtë të martë një diskutim me përfaqësues të sektorit të ndërtimit, gjatë një takimi me bizneset, ku në fokus ishte cilësia e ndërtimeve dhe masat e reja ligjore që qeveria ka miratuar për këtë sektor.
Gjatë një hapësire pyetje përgjigje, Rama iu drejtua drejtpërdrejt një ndërtuesi të pranishëm, duke e lidhur debatin me problematikat e akumuluara ndër vite në ndërtim, si dhe me ndryshimet ligjore që, sipas tij, synojnë rritjen e standardeve dhe mbrojtjen e qytetarëve që investojnë kursimet e jetës për një banesë.
Kryeministri u shpreh se, pavarësisht përmirësimeve të viteve të fundit, zbatimi i projekteve në terren mbetet problematik dhe shpeshherë larg standardeve të miratuara në dokumentacion. Sipas tij, dëmet që vijnë nga ndërtimet me cilësi të ulët vazhdojnë të jenë të pranishme, ndërkohë që qytetarët paguajnë shuma të konsiderueshme ose marrin kredi afatgjata për të blerë një banesë.
Rama theksoi se qeveria ka miratuar një paketë të re masash ligjore për ndërtimin, me synimin për të rritur cilësinë dhe për të ndëshkuar abuzimet. Ai deklaroi se nuk mund të tolerohet që qytetarët të paguajnë për produkte të cilësisë së parë dhe të marrin në këmbim ndërtime të cilësisë së tretë, duke e cilësuar këtë situatë si të papranueshme dhe kriminale.
Sa i përket taksës së infrastrukturës dhe kërkesave për lehtësim të pagesave, Rama u shpreh se çështja është në diskutim, por çdo vendimmarrje duhet të lidhet me performancën reale të kompanive ndërtuese. Ai tha se shteti nuk mund të marrë përsipër riskun e lejimit të kësteve për kompani që nisin ndërtimet dhe më pas deklarojnë pamundësi për të përmbushur detyrimet financiare.
Kryeministri nënvizoi se Shqipëria u ka dhënë shumë ndërtuesve ndër vite dhe se tani është koha që ky sektor të japë mbrapsht në aspektin e cilësisë. Sipas tij, ndërtesat që ndërtohen sot do të jenë pjesë e qyteteve për dhjetëra vite dhe nuk mund të pranohet që projektet e miratuara si cilësore të shndërrohen në objekte që nuk përputhen me lejen dhe standardet.
Ai solli shembuj konkretë të qytetarëve që kanë blerë apartamente sipas projekteve të paraqitura dhe më pas janë përballur me ndryshime të paligjshme në ndërtim, mungesë ballkonesh apo pamundësi për të marrë hipotekën për shkak të shkeljeve nga ndërtuesit. Rama theksoi se këto raste përbëjnë shkelje të rënda dhe do të ndëshkohen.
Në këtë kuadër, kryeministri bëri të ditur se është krijuar lista e zezë e ndërtuesve, ku subjektet që përfshihen në të nuk do të përfitojnë leje ndërtimi për shumë vite. Ai shtoi se edhe lista e bardhë mund të ndryshojë menjëherë nëse evidentohen shkelje, duke paralajmëruar se toleranca ndaj abuzimeve ka marrë fund.
Rama u shpreh se ndërtimi nuk është një produkt i përkohshëm, por diçka që mbetet për dekada dhe ndikon drejtpërdrejt në cilësinë e jetës dhe pamjen e qyteteve. Sipas tij, arkitektura dhe cilësia e ndërtimit janë faktorë kyç për zhvillimin e një vendi dhe Shqipëria nuk mund të lejojë më ndërtime që shëmtojnë territorin, pavarësisht vlerës së lejeve apo investimeve të pretenduara nga ndërtuesit. /skyweb.al
