Shqipëria po përgatitet të hyjë në një fazë të re të komunikimeve elektronike, duke synuar barazimin e tarifave të roaming-ut me vendet e Bashkimit Evropian.
Një projektligj i hedhur për konsultim publik parashikon ndryshime në kuadrin ligjor të komunikimeve elektronike, me qëllim aplikimin e parimit “Roaming Like At Home” për qytetarët shqiptarë që udhëtojnë në vendet e BE-së.
Në praktikë, kjo do të nënkuptojë që përdorimi i internetit, thirrjeve telefonike dhe mesazheve jashtë vendit të mos shoqërohet më me kosto shtesë.
Abonentët shqiptarë do të përdorin shërbimet celulare në Evropë me të njëjtat tarifa që kanë në paketat e tyre brenda vendit, pa pasur nevojë për karta SIM lokale apo kufizime nga frika e faturave të larta.
Nisma konsiderohet një hap i rëndësishëm në procesin e integrimit të Shqipërisë në tregun digjital evropian. Në këtë proces, një rol kyç do ta luajë Autoriteti i Komunikimeve Elektronike dhe Postare, i cili do të harmonizojë politikat kombëtare me rregullat e Bashkimit Evropian, në bashkëpunim me BEREC, institucionin evropian që mbikëqyr tregun e telekomunikacionit. AKEP do të përcaktojë kufijtë maksimalë të tarifave dhe kriteret e përdorimit të drejtë, për të shmangur çdo praktikë abuzive nga operatorët.
Projektligji adreson edhe një tjetër problem të ndjeshëm për qytetarët, atë të kostos së thirrjeve ndërkombëtare. Parashikohet vendosja e një tarife të unifikuar për thirrjet nga vendet e BE-së drejt Shqipërisë, e njohur si eurotarifë, duke ulur ndjeshëm shpenzimet për komunikimin me familjarët dhe të afërmit që jetojnë jashtë vendit.
Për të garantuar zbatimin efektiv të këtyre rregullave, parashikohen masa ndëshkuese për operatorët që nuk respektojnë vendimet e autoritetit rregullator. Shkeljet do të shoqërohen me gjoba administrative, ndërsa procesi i zbatimit nuk pritet të sjellë kosto shtesë për buxhetin e shtetit. Përfitimi kryesor, sipas projektligjit, do t’u takojë qytetarëve dhe bizneseve, të cilët do të kenë komunikim më të lirë dhe më të thjeshtë me vendet e Bashkimit Evropian.
