Nga 1 janari 2026, një numër i madh pensionistësh në të gjithë vendin do të përfitojnë shtesa mujore mbi pensionin ekzistues. Vendimi i miratuar nga qeveria parashikon rritje nga 600 deri në 1 800 lekë në muaj, në varësi të kategorisë dhe nivelit të të ardhurave.
Masa synon të mbështesë pensionistët me të ardhura të ulëta dhe të zbusë ndikimin e kostos së jetesës. Pagesa do të kryhet çdo muaj së bashku me pensionin dhe do të financohet nga buxheti i shtetit për vitin 2026.
Përfituesit e kompensimit deri në 1 800 lekë në muaj janë pensionistët me të ardhura mujore deri në 40 000 lekë. Në këtë kategori përfshihen pensionistët me pension pleqërie të plotë para dhe pas reformës së vitit 2015, nënat me shumë fëmijë, pensionet e reduktuara si dhe pensionistët e minierave, industrisë së naftës, gazit dhe metalurgjisë.
Kompensimi deri në 1 000 lekë në muaj u jepet pensionistëve me të ardhura deri në 18 000 lekë. Këtu përfshihen kryesisht pensionistët e ish kooperativave bujqësore dhe pensionistët ruralë.
Kompensimi deri në 800 lekë në muaj përfshin pensionistët me të ardhura deri në 22 000 lekë. Në këtë grup hyjnë pensionistët me pension pleqërie të pjesshëm, ata që nuk plotësojnë vitet e nevojshme të sigurimit si dhe përfituesit e pensionit social.
Për pensionet e invaliditetit dhe pensionet familjare parashikohen shtesa të veçanta. Pensioni i invaliditetit përfiton 600 lekë në muaj për të ardhura deri në 30 000 lekë, ndërsa pensioni familjar përfiton 700 lekë në muaj për të ardhura deri në 18 000 lekë.
Në rastet kur dhënia e kompensimit të plotë do të sillte tejkalim të kufirit maksimal të të ardhurave, shtesa do të jepet vetëm si diferencë, në mënyrë që të ardhurat mujore të mos e kalojnë tavanin e përcaktuar.
Në përllogaritjen e të ardhurave mujore përfshihen pensioni bazë, shtesat suplementare, trajtimet e veçanta financiare si dhe kompensimet e mëparshme të miratuara me vendime të Këshillit të Ministrave.
Skema përfshin edhe personat që dalin në pension nga 1 janari 2026, por që e kanë fituar të drejtën deri më 31 dhjetor 2025, si edhe ata që fitojnë të drejtën e pensionit gjatë vitit 2026. Personat që fitojnë të drejtën pas 1 janarit 2027 nuk përfshihen në këtë skemë.
Kostoja totale e masës llogaritet në 9.8 miliardë lekë dhe do të mbulohet nga buxheti i sigurimeve shoqërore për vitin 2026. /skyweb.al
