Me kërkesë të Prokurorisë së Posaçme kundër Korrupsionit dhe Krimit të Organizuar, Gjykata e Posaçme ka vendosur zgjatjen me tre muaj të afateve hetimore për dosjen e njohur si “Bankers Petroleum”.
Sipas organit të akuzës, zgjatja është e domosdoshme për kryerjen e veprimeve të tjera hetimore shtesë, për shkak të kompleksitetit të çështjes. Kërkesa u paraqit nga prokuroret Enkeleda Millonai dhe Anita Jella dhe u miratua nga gjyqtari i GJKKO-së, Erion Çela.
Aktualisht, i vetmi person që ndodhet në masën e sigurisë “arrest në burg” për këtë çështje është CEO kinez i kompanisë, Hongping Xiao. Të pandehurit e tjerë janë nën masa më të lehta sigurie, përfshirë arrestin në shtëpi.
Hetimi i SPAK lidhet me dyshime për deklarime të rreme tatimore dhe shmangie të detyrimeve financiare për një periudhë 20-vjeçare, nga viti 2004 deri në vitin 2024, çka dyshohet se ka sjellë një dëm të konsiderueshëm në buxhetin e shtetit.
Sipas Prokurorisë, “Bankers Petroleum” ka realizuar shitje dhe eksporte nafte në vlerën totale prej rreth 532 miliardë lekësh, ndërkohë që në dokumentacionin zyrtar ka deklaruar humbje për çdo vit, me një total prej 11.7 miliardë lekësh. Kjo skemë dyshohet se i ka mundësuar kompanisë shmangien e tatimit mbi fitimin, si edhe përfitimin e rimbursimeve të dyshimta të TVSH-së.
Paralelisht me hetimet penale, disa ditë më parë Drejtoria e Përgjithshme e Doganave bllokoi aktivitetin e kompanisë “Bankers Petroleum”, për shkak të një detyrimi financiar të papaguar. Bëhet fjalë për një gjobë prej 120 milionë eurosh, të vendosur që në vitin 2019, pasi kompania nuk kishte paguar rreth 30 milionë euro akcizë për holluesin e përdorur në procesin e nxjerrjes së naftës.
Dosja “Bankers Petroleum” mbetet një nga hetimet më të mëdha financiare të viteve të fundit, ndërsa zgjatja e afateve sinjalizon se SPAK po thellon verifikimet mbi aktivitetin shumëvjeçar të kompanisë dhe përgjegjësitë konkrete të drejtuesve të saj. /skyweb.al
