Shqipëria po përballet me një plakje të përshpejtuar të popullsisë, teksa të rinjtë po largohen nga vendi dhe përqendrimi i tyre mbetet thuajse i kufizuar vetëm në kryeqytet.
Sipas të dhënave të fundit nga INSTAT, më 1 janar 2025, numri i banorëve në Shqipëri ishte rreth 2.3 milionë, një rënie me 1.2% krahasuar me vitin e kaluar.
Edhe pse shtesa natyrore për vitin 2024 ka qenë pozitive, me 1,208 lindje më shumë sesa vdekje, kjo nuk ka qenë e mjaftueshme për të ndalur rënien e përgjithshme të popullsisë. Faktori përcaktues mbetet emigracioni: gjatë vitit 2024, më shumë se 28 mijë qytetarë kanë lënë Shqipërinë, duke thelluar boshatisjen demografike të vendit.
Pasojat janë të dukshme në strukturën e popullsisë. Mosha mesatare është rritur nga 43.5 në 44.3 vjeç, duke reflektuar qartë procesin e plakjes. Në të njëjtën kohë, raporti i varësisë për të moshuarit ka arritur në 33%, duke rënduar gjithnjë e më shumë mbi popullsinë në moshë pune. Ndërsa raporti i varësisë për të rinjtë ka rënë lehtë në 23.8%, duke sinjalizuar uljen e numrit të fëmijëve dhe të rinjve.
Kryeqyteti është i vetmi që tregon shenja rritjeje. Tirana ka shënuar një rritje modeste prej 0.2% të popullsisë gjatë vitit të kaluar, falë përqendrimit të vendeve të punës, mundësive arsimore dhe jetës sociale që tërheq të rinjtë nga qarqet e tjera. Sot, Tirana strehon 32.2% të popullsisë totale të vendit.
Ndryshe ndodh në qarqet e tjera, ku mungesa e mundësive ka shkaktuar një zbrazje të ndjeshme. Shkodra ka humbur 2.5% të popullsisë në një vit, ndërsa Kukësi 2.3%. Emigrimi dhe rënia e lindshmërisë kanë tkurrur ndjeshëm edhe qytete të tjera si Dibra, Gjirokastra apo Lezha, duke i lënë rrugët e lagjet gjithnjë e më të qeta dhe më të vjetra në profil.
Ekspertët paralajmërojnë se ky trend mund të ketë pasoja serioze për të ardhmen e vendit, nga fuqia punëtore e munguar deri te presioni mbi sistemet e pensioneve dhe kujdesit shëndetësor. Pa ndërhyrje të shpejta politike dhe ekonomike, Shqipëria rrezikon të bëhet një vend i të moshuarve, ku e ardhmja shpërngulet gjithnjë e më shumë jashtë kufijve të saj. /skyweb.al
