Prej ditës së sotme, sigurimi i detyrueshëm motorik për përgjegjësitë ndaj palëve të treta do të funksionojë sipas parimit bonus–malus, duke ndryshuar mënyrën se si përllogaritet çmimi i policës për drejtuesit e mjeteve.
Sipas këtij mekanizmi, shoferët që kanë shkaktuar aksidente apo dëme do të përballen me kosto më të larta sigurimi, ndërsa ata që nuk kanë histori dëmesh do të përfitojnë tarifa më të ulëta.
Megjithatë, ekspertët e tregut paralajmërojnë se diferenca do të ndihet kryesisht tek drejtuesit me precedentë negativë, ndërsa ulja e primit për drejtuesit korrektë pritet të jetë e kufizuar.
Bazat ligjore për këtë ndryshim janë vendosur prej disa vitesh. Në vitin 2021 hyri në fuqi ligji për sigurimin e detyrueshëm në sektorin e transportit, i cili parashikonte mundësinë e aplikimit të bonus–malus-it, por e linte zbatimin në diskrecionin e kompanive të sigurimit.
Vetëm në vitin 2024 Autoriteti i Mbikëqyrjes Financiare miratoi rregulloren për faktorët e riskut në përllogaritjen e primit, e cila u zbatua nga 1 janari 2025. Në fazën e parë, sistemi bonus–malus u la jashtë dhe u shty për vitin 2026.
Aktualisht, çmimi i sigurimit përcaktohet mbi disa elementë risku, si historiku i dëmeve, fuqia e motorit, mosha dhe përvoja e drejtuesit, përdorimi privat apo biznesor i mjetit, zona e regjistrimit dhe vjetërsia e automjetit. Me hyrjen në fuqi të bonus–malus-it, pesha e historikut të aksidenteve pritet të rritet ndjeshëm. /skyweb.al
